भूपरिवेष्टित विकासशील राष्ट्रहरूको (LLDC) तेस्रो संयुक्त राष्ट्रसंघीय सम्मेलन आजदेखि तुर्कमेनिस्तानको अवाजा सहरमा सुरु भएको छ। उद्घाटन सत्रमा संयुक्त राष्ट्रका महासचिव एन्टोनियो गुटेरेस र तुर्कमेनिस्तानका राष्ट्रपति सेरदार बेरदिमुहामेदोभले सहभागी मुलुकहरूलाई सहयोग, सहकार्य र समन्वयमार्फत आर्थिक–सामाजिक समस्याको समाधान खोज्न आह्वान गर्नुभयो।

महासचिव गुटेरेसले विशेष गरी अन्तरराष्ट्रिय बजारसम्म पहुँच अभावका कारण भूपरिवेष्टित मुलुकहरूले भोगेका कठिनाइ समाधानका लागि "साझा प्रयास, दृढ प्रतिबद्धता र दीगो समाधान" आवश्यक रहेको बताउनुभयो।

सम्मेलनमा संयुक्त राष्ट्रसंघको ७९औँ महासभाका अध्यक्ष फिलेमोन युन्जीले समेत सम्बोधन गर्दै दक्षिण–दक्षिण सहकार्य र युवाको सशक्तिकरणलाई प्राथमिकता दिन आग्रह गर्नुभयो।

सम्मेलनको प्लेनरी सत्र अवाजास्थित पर्यटकीय भवनमा जारी छ। आजै प्रधानमन्त्री केपी शर्मा ओलीले नेपाली प्रतिनिधिमण्डलको नेतृत्व गर्दै सम्मेलनलाई सम्बोधन गर्नुहुनेछ। उहाँले एलएलडिसी समूहको तर्फबाट समेत साझा आवाज प्रस्तुत गर्ने कार्यक्रम रहेको छ।

प्रधानमन्त्रीको भ्रमण टोलीमा प्रथम महिला राधिका शाक्य, मुख्य सल्लाहकार विष्णुप्रसाद रिमाल, सांसद सूर्यबहादुर थापा क्षेत्री, प्रमूख स्वकीय सचिव राजेश बज्राचार्य, निजी चिकित्सक डा. दिव्यासिंह शाह तथा परराष्ट्र सचिव अमृतबहादुर राईलगायत सहभागी हुनुहुन्छ।

एलएलडिसी राष्ट्रहरूका लागि सन् २०१४ पछि यो सम्मेलन तेस्रो पटक आयोजना गरिएको हो। समुद्रसम्म प्रत्यक्ष पहुँच नभएका कारण यी राष्ट्रहरूले अन्तरराष्ट्रिय व्यापार र ‘कनेक्टिभिटी’मा असमानता भोग्नुपरेको सन्दर्भमा सम्मेलनलाई विशेष महत्व दिइएको छ।