मदिरा तस्करी नियन्त्रण गर्ने क्रममा सप्तरीको राजगढ गाउँपालिकामा गए राति प्रहरीद्वारा चलाईएको गोली लागेर एक जनाको मृत्यु भएपछि स्थानीय आक्रोशित बनेका छन्। मृतक ३६ वर्षीय लालु यादवको आत्मरक्षाका लागि गोली चलाउँदा मृत्यु भएको दाबी प्रहरीको छ भने स्थानीयले भने नियोजित हत्या भएको आरोप लगाएका छन्।

मंगलबार राति राजगढ गाउँपालिका–२ कमलपुरमा प्रहरीले तस्करीको सूचना पाएपछि सर्च अपरेशन चलाएको थियो। भारतीय सीमासँग सटेका कारण तस्करी हुने गरेको जनाउँदै प्रहरीले ठुलो मात्रामा मदिरा बरामद गरेको जनाएको छ। सो क्रममा स्थानीय र प्रहरीले झडप भएको र ढुंगा मुडासमेत प्रहार भएपछि आत्मरक्षाका लागि गोली चलाएको प्रहरी नायब उपरीक्षक जितेन्द्रकुमार बस्नेतले बताए।

गोली तिघ्रामा लागेका लालु यादवको गजेन्द्रनारायण सिंह अस्पताल लैजाने क्रममा बाटोमै मृत्यु भएको हो। तर, घटनाको भिन्न विवरण प्रस्तुत गर्दै मृतकका आफन्त र स्थानीयले प्रहरीमाथि गम्भीर आरोप लगाएका छन्।

राजगढ–१ निवासी दीपेन्द्र यादवका अनुसार, “प्रहरीले मृतकलाई पहिला बोलायो, त्यसपछि घर खानतलासीका क्रममा सामान्य विवाद भयो, र नियन्त्रणमा लिएर गोली हानेर खेतमा फ्याँकेको हो।”

मृतकका ज्वाइँ तथा प्रदर्शनमा सहभागी संजीवनारायण यादवका अनुसार लालु यादव विद्यालय व्यवस्थापन समितिका अध्यक्ष समेत थिए र मदिरा व्यापार लाइसेन्स लिएर कानुनीरूपमै गर्दै आएका थिए। उनले प्रहरीको कामप्रति प्रश्न उठाउँदै भने, “निहत्थालाई नियन्त्रणमा लिएर गोली हान्नु मानव अधिकारको उल्लङ्घन हो।”

घटनापछि आक्रोशित स्थानीयले जिल्ला प्रहरी कार्यालय सप्तरीको गेट अगाडि टायर बालेर प्रदर्शन गरेका छन्। तनाव बढेपछि थप प्रहरी परिचालन गरिएको छ। जिल्ला प्रहरी कार्यालयका अनुसार घटनास्थलबाट विभिन्न ब्रान्डका ८० कार्टुन मदिरा बरामद गरिएको छ।