लमजुङ प्रहरीले एक आर्थिक वर्षको अवधिमा करिब दुई सय अवैध हतियार बरामद गरेको छ। आर्थिक वर्ष २०८१/८२ मा जिल्लाका विभिन्न स्थानबाट पाँच वर्षभन्दा बढी समयदेखि नवीकरण नभएका १९७ थान हातहतियार नियन्त्रणमा लिएको जिल्ला प्रहरी कार्यालय लमजुङले जनाएको छ।

प्रहरी नायब उपरीक्षक रेशम बोहराका अनुसार जिल्लामा शान्ति सुरक्षाको अवस्थालाई मध्यनजर गर्दै जिल्ला प्रशासन कार्यालयको सहयोगमा प्रहरीले विशेष अभियान सञ्चालन गरेको थियो। "हामीले गत आर्थिक वर्षमा मात्र १९७ वटा हतियार बरामद गरेका छौँ, जसमा अधिकांश नवीकरणविना घरमै राखिएका थिए," डीएसपी बोहराले बताए।

पाँच वर्षदेखि नवीकरण नगरेका हजारौं हतियारमध्ये केही मात्र बुझाइयो जिल्ला प्रशासन कार्यालय लमजुङका अनुसार जिल्लामा हाल एक हजारभन्दा बढी हतियार दर्ता छन्। तर, गत आर्थिक वर्षमा जम्मा २७६ वटा हतियार मात्र नवीकरण भएका थिए। तीमध्ये १४३ वटा नवीकरण, २१ वटा नामसारी, बाँकी अन्य प्रक्रियामा रहेको विवरण सार्वजनिक गरिएको छ।

प्रशासनका अनुसार पटकपटक आग्रह गर्दा पनि पाँच वर्षभन्दा बढी समयदेखि नवीकरण नभएका हतियार बुझाउन थोरै मात्र व्यक्तिहरू आएका थिए। गृह मन्त्रालयको निर्देशनअनुसार यस्ता हतियारको इजाजत खारेज गरी प्रहरीद्वारा बरामद गरिएको हो।प्रहरीले हतियार दुरुपयोग तथा अपराधमा प्रयोग हुन सक्ने सम्भावनालाई दृष्टिगत गर्दै विशेष अभियान चलाएको बताएको छ। "इजाजत नपाएका व्यक्तिले हतियार प्रयोग गर्न थालेको, पुराना हतियारको दुरुपयोग बढेको, शान्ति सुरक्षामा असर परेको आशंका बलियो बन्दै गएको छ," प्रहरी प्रमुख बोहराले स्पष्ट पारे।

हालसम्म प्रहरीले ७६४ थान हातहतियारको लगत सङ्कलन गरी खोजी कार्य तीव्र बनाएको छ। तीमध्ये पाँच सयभन्दा बढीको विवरण प्राप्त भइसकेको र अन्यको खोजी जारी रहेको प्रहरीले जनाएको छ। प्रशासनले हतियार नवीकरण गर्न आह्वान गर्दै पटकपटक सूचना जारी गरेको भए पनि जनताको सहभागिता न्यून देखिएको छ। प्रहरीले अब बाँकी रहेका अवैध हतियार पनि जफत गर्ने अभियानलाई निरन्तरता दिने स्पष्ट पारेको छ।