आक्रमण तीव्र, ९७५२ भन्दा बढीको ज्यान गयो तेलअभिव - इजरायली प्रधानमन्त्री बेन्जामिन नेतान्याहुको गाजा शहर नियन्त्रणमा लिने योजना इजरायलको सुरक्षा क्याबिनेटले अनुमोदन गरेको छ। प्रधानमन्त्रीको कार्यालयले शुक्रबार जारी गरेको विज्ञप्तिमा उक्त जानकारी दिइएको हो।

नेतान्याहुले गाजामा स्थायी सुरक्षा सुनिश्चित गर्न, हमासलाई पूर्णरूपमा हटाउन र सम्पूर्ण क्षेत्रको नियन्त्रण लिनुपर्ने आवश्यकता औंल्याउँदै यसबारे फक्स न्यूजसँगको अन्तर्वार्तामा बताएका थिए। उनले भने, “हामी यो क्षेत्र हाम्रो सुरक्षाका लागि चाहन्छौं, र यो नियन्त्रण सेनालाई हस्तान्तरण हुनेछ।”

उनले गाजाबासीहरूको आवश्यकतालाई मध्यनजर गर्दै सैन्य कारबाहीको ढाँचा बनाइने पनि स्पष्ट पारेका छन्।

तर, यस कदमको हमासले विरोध गर्दै नेतान्याहुको अभिव्यक्तिले वार्ता र युद्धविरामको सम्भावनालाई हटाएर हमासको पूर्ण उन्मूलनलाई प्राथमिकतामा राखेको जनाएको छ।

इजरायली पुनः आक्रमण मार्च १८ बाट सुरु भएको हो। गाजाका स्वास्थ्य अधिकारीहरूका अनुसार बिहीबारसम्म कम्तीमा ९,७५२ जना प्यालेस्टिनीको मृत्यु भइसकेको छ भने ४० हजारभन्दा बढी घाइते भएका छन्।