त्रिभुवन अन्तर्राष्ट्रिय विमानस्थलमा जेनजी आन्दोलनका कारण उडान सेवा अझै प्रभावित भएको छ। मंगलबार दिउँसो करिब २ः३० बजेदेखि बन्द गरिएको विमानस्थल बुधबार राति १ बजेसम्म सञ्चालनमा आउन सकेन। बुधबार बिहान बुद्ध एयरले सार्वजनिक गरेको सूचनाअनुसार, मध्यान्ह १२ बजेसम्म कुनै पनि उडान नहुने भएको छ।

देशभर आन्तरिक उडानमा यात्रु संख्या धेरै हुने बुद्ध एयरले यात्रुलाई असुविधा भएको स्वीकार गर्दै क्षमायाचना गरेको छ। कम्पनीले टिकट लिएर यात्रा गर्न नसकेकाहरुको भाडा फिर्ता गरिने जनाएको छ। यसले प्रभावित गन्तव्यतर्फका अन्य वायुसेवाका उडान पनि स्थगित भएको पुष्टि गरेको छ।

वायुसेवा सञ्चालक सङ्घका अध्यक्ष मनोज कार्कीले बुधबार विज्ञप्ति जारी गर्दै, जस्तोसुकै विषम परिस्थितिमा पनि यात्रुलाई सेवा दिन सदस्य कम्पनीहरु तयार रहेको बताएका छन्। उनले आन्दोलनका क्रममा भदौ २३ गते भएका घटनामा ज्यान गुमाउनेप्रति श्रद्धाञ्जली र शोकसन्तप्त परिवारप्रति समवेदना व्यक्त गरेका छन्। घाइतेहरुको स्वास्थ्य लाभको शुभकामना पनि गरिएको छ।

यहीबीच, वायुसेवा सञ्चालक सङ्घले हेलिकप्टर सेवा सम्बन्धी विवादबारे स्पष्ट पार्दै हालसम्म कुनै राजनीतिज्ञ वा मन्त्रीलाई उडान सुविधा नदिएको दाबी गरेको छ।

नेपालको प्रमुख हवाई ढोका लामो समयसम्म ठप्प हुँदा यात्रु, विमान कम्पनी र अर्थतन्त्र सबै प्रभावित भएका छन्। परिस्थिति सामान्य हुनासाथ सेवा सुचारु हुने अपेक्षा गरिएको छ।