नेपाली सेनाका प्रधानसेनापति अशोकराज सिग्देलको चीन भ्रमण स्थगित भएको छ ।

पूर्वनिर्धारित कार्यक्रमअनुसार सिग्देल भदौ २७ गते प्रस्थान गरी असोज ४ गते फर्कने गरी आठ दिने भ्रमणमा चीन जाने तयारीमा थिए । तर, मुलुकमा उत्पन्न भएको असामान्य राजनीतिक तथा सुरक्षासम्बन्धी परिस्थितिलाई ध्यानमा राख्दै उक्त भ्रमण हालका लागि रोकिएको नेपाली सेनाले जनाएको छ ।

नेपाली सेनाले जारी गरेको जानकारीअनुसार राष्ट्रको सुरक्षासम्बन्धी चुनौतीका बीचमा प्रधानसेनापतिको उपस्थिति अपरिहार्य भएकाले भ्रमण स्थगित गर्ने निर्णय गरिएको हो । सेनाले यसलाई परिस्थिति सामान्य भएपछि उपयुक्त समयमा फेरि पुनर्निर्धारण गर्न सकिने संकेत गरेको छ ।

चीन भ्रमणमा उच्चस्तरीय सुरक्षा वार्ता, द्विपक्षीय सहकार्य विस्तार तथा सैनिक प्रशिक्षणसम्बन्धी छलफल हुने अपेक्षा गरिएको थियो । भ्रमण रोकिएपछि यी एजेन्डा केही समयका लागि स्थगित भएका छन् ।

यसबीचमा मुलुकभित्र देखिएको अनिश्चितता र अस्थिरतालाई मध्यनजर गर्दै सेना नेतृत्वले आन्तरिक जिम्मेवारीलाई प्राथमिकता दिएको स्पष्ट देखिन्छ । परिस्थितिको स्थायित्वसँगै बाह्य सहकार्यतर्फको कदम पुनः अघि बढाइने अपेक्षा गरिएको छ ।