काठमाडौंको भृकुटीमण्डपमा सुरु भएको १७औँ नाडा अटो शोको उद्घाटन प्रधानमन्त्री केपी शर्मा ओलीले गरे। उद्घाटनकै क्षणलाई आयोजकहरूले ‘नेपालमै पहिलो फ्लाइङ कार’ भनेर तमासा बनाए, तर वास्तविकता भने अर्कै थियो—यो कार होइन, ई–ह्याङ २१६–एस (Deepal eVTOL) नामक दुई सिटे ड्रोन मात्रै हो, जसलाई चीनबाट ल्याएर हलमा राखिएको थियो। प्रधानमन्त्री ओलीसँगै अर्थमन्त्री विष्णु प्रसाद पौडेल पनि त्यहाँ उपस्थित थिए। पूर्वप्रधानमन्त्री पुष्पकमल दाहाल र माधवकुमार नेपालसहित स्वास्थ्य मन्त्री प्रदीप पौडेल पनि अटो शोमा पुगेका थिए। उनीहरूलाई समेत आयोजकहरूले ‘कार’ भनेर देखाए, नेताहरूलाई बसालियो, फोटो खिचियो, अनि जनतालाई प्रवेश शुल्कसहित ‘फ्लाइङ कार’ हेर्न लोभ्याइयो।

तर गाडी विशेषज्ञहरू भन्छन्—यो ‘कार’ भन्नै मिल्दैन। पाङ्ग्रा छैन, सडकमा गुड्दैन, स्टेयरिङ र पेडल छैन, करिब १५–२० मिनेट मात्र आकाशमा उड्छ अनि ब्याट्री सकिन्छ। नियमअनुसार यो कार नभई पूर्ण रूपमा विमान वर्गको ड्रोन हो। यसलाई निजी प्रयोगका लागि चलाउन पाइँदैन, विशेष अनुमति चाहिन्छ। अझै चार्जिङ हब, उडान मार्ग र नियन्त्रण केन्द्रजस्ता पूर्वाधार नभएसम्म यसको प्रयोग कारको विकल्प बन्नै सक्दैन।

यसैबीच, यो प्रदर्शनले विष्णु कुमार अग्रवाललाई फेरि विवादको केन्द्रमा ल्याइदिएको छ। चाङआन नेपालमार्फत ‘फ्लाइङ कार’ ल्याएका उनी नाडा अटोमोबाइल्स एशोसिएसनका वर्तमान अध्यक्ष करण चौधरीका नजिकका आफन्त हुन्। वर्षौंदेखि डिजेल–पेट्रोल गाडीमार्फत बजार नियन्त्रण गर्दै ‘जनतालाई ठगेको’ भन्ने आलोचना खेप्दै आएका अग्रवाल यसपालि पनि नयाँ चाल लिएर आए। भन्न थाले—‘कार’, तर देखाए—ड्रोन। यस्तो कला त माडबारी व्यापारीमै सम्भव हुन्छ, जसले राजनीतिको ‘एक्का, मिस्सी, बास्सा’ सम्मलाई उल्लु बनाएर अन्ततः प्रधानमन्त्रीलाई समेत ड्रोनलाई कार भन्न लगाइदिन्छ।

विदेशी अटो शोमा यस्ता प्रविधि देखाउँदा आकाशमै उडाइन्छ, सडकमै गुडाइन्छ, दर्शकलाई टेस्ट ड्राइभ गराइन्छ। तर काठमाडौंमा भने ड्रोनलाई विमानमै ल्याइयो, गाडीमा राखेर हलसम्म पुर्‍याइयो, काँधमा बोकेर स्टेजमा राखियो। न उडाइयो, न गुडाइयो—बस नेतालाई बसालियो, जनतालाई हेर्न पैसा असुलियो, बस्ने वा छुन चाहनेलाई फेरि थप शुल्क तिराइयो।

दर्शकहरू आक्रोशित भए। कसैले सामाजिक सञ्जालमा लेखे, “कार भनेर ल्याएको त ड्रोन ! हामीलाई त मूर्ख बनाए।” अर्कोले भन्यो, “नेतालाई समेत कार भनेर देखाएपछि साधारण जनता त झन् सजिलै ठगिन्छन्।”

एक अनलाइन मिडियासँग कुरा गर्दै शोका संयोजक अनुप बरालले भने, “यो प्रविधि ल्याउने उद्देश्य नेपाल प्रविधिबाट टाढा छैन भन्ने सन्देश दिनु हो।” तर सो सन्देश दिने क्रममा ‘कार’ भन्ने शब्द प्रयोग गरेर आम मानिसलाई गुमराह बनाइएको आलोचना अझै शान्त भएको छैन।

यस विषयमा अग्रवाल वा चाङआन नेपालतर्फबाट भने अहिलेसम्म ठोस प्रतिक्रिया आएको छैन।

यो घटनाले एउटा ठूलो प्रश्न उठाएको छ—जब नेतासम्मलाई ‘फ्लाइङ कार’ भन्दै ड्रोन देखाएर भ्रममा पारिन्छ भने, सोझा जनता त कति पटक, कति तरिकाले ठगिँदै आएका होलान् ? अब नीति बनाउनेहरूले यस्ता भ्रामक प्रचारलाई नियन्त्रण गर्ने हो कि हामी फेरि पनि आँखामै धुलो हालिँदै हेरिरहने ?