काठमाडौंमा हालैको आन्दोलनपछि तोडफोड र आगजनीका कारण बिग्रिएको वातावरण व्यवस्थापनका लागि निजी क्षेत्र पनि सक्रिय बनेको छ। शिवम् सिमेन्टले मंगलबार जिल्ला प्रशासन कार्यालय, काठमाडौंसँग समन्वय गरेर सरसफाई अभियान सञ्चालन गरेको छ। कम्पनीले सरसफाईका साथै कार्यालय सञ्चालन सहज बनाउन आवश्यक फर्निचर पनि उपलब्ध गराएको जिल्ला प्रशासनले जनाएको छ।

शिवम् सिमेन्टका प्रतिनिधिहरूका अनुसार यो सहयोगलाई सामाजिक उत्तरदायित्वअन्तर्गतको निरन्तर अभियानको हिस्सा बनाइनेछ। उनीहरूले आगामी दिनहरूमा पनि श्रमदान र सरसफाई कार्यक्रमलाई निरन्तरता दिने प्रतिबद्धता जनाए। “समुदाय र शहरलाई पुनः व्यवस्थित र सुरक्षित बनाउन योगदान गर्नु हाम्रो कर्तव्य हो,” कम्पनीको वक्तव्यमा उल्लेख छ।

आन्दोलनपश्चात राजधानीमा सरकारी तथा सार्वजनिक कार्यालयहरू प्रभावित बनेका छन्। यस्तै अवस्थामा निजी कम्पनीहरूको सहकार्यले आधारभूत सेवासुविधा सहज बनाउन मद्दत गर्ने अपेक्षा गरिएको छ। यस्ता गतिविधिले राज्य र निजी क्षेत्रबीचको सहकार्यलाई थप मजबुत पार्ने संकेत देखिएको छ।