अगस्ट महिनामा अमेरिकातर्फ जापानको निर्यात करिब १४ प्रतिशतले घटेको जापानको वित्त मन्त्रालयले बुधबार सार्वजनिक गरेको तथ्याङ्कले देखाएको छ। ब्लुमबर्गका अनुसार यो चार वर्षयताको सबैभन्दा ठूलो गिरावट हो, जसमा अटोमोबाइल ढुवानी प्रमुख कारण बनेको छ।

तथ्याङ्कअनुसार, अटोमोबाइल निर्यात २८.४ प्रतिशतले घटेको छ भने अटो पार्ट्सको निर्यात ७.१ प्रतिशतले कम भएको छ। अमेरिकातर्फ हुने कुल जापानी निर्यातको झन्डै एक तिहाइ हिस्सा ओगट्ने अटो उद्योग यस पटक २७.५ प्रतिशतसम्मको लेवीको मारमा परेको छ। यो गिरावटलाई अमेरिकी राष्ट्रपति डोनाल्ड ट्रम्प प्रशासनको कडा कर नीतिले थप गहिरो बनाएको विश्लेषकहरूले बताएका छन्।

ट्रम्पले विश्वव्यापी रूपमा उच्च आयात भन्सार शुल्क लगाउने नीति अगाडि सारेपछि बजारमा हलचल देखिएको हो। ट्रम्प प्रशासनले लामो समयदेखि आलोचना गर्दै आएको जापानसँगको व्यापार अधिशेष पनि गत अगस्टमा ५० प्रतिशतले घटेर ३ खर्ब २४ अर्ब येन (करिब २.२१ अर्ब अमेरिकी डलर) मा सीमित भएको छ।

यसबीच, मंगलबार लागु भएको नयाँ व्यापार सम्झौताले जापानी अटोहरूमा अमेरिकी कर केही घटाएको छ। सम्झौता अनुसार, अब जापानी कारलगायतका सवारी साधनमा अन्य धेरै वस्तु सरह १५ प्रतिशत टोल तिर्नुपर्नेछ। यो व्यवस्था जापानी उद्योगका लागि अस्थायी जीत मानिएको भए पनि, उच्च करको दबाबका कारण टोकियोले वाशिङटनसँग थप वार्ता अघि बढाउने अपेक्षा गरिएको छ।

टोयोटा र होन्डा जस्ता ठूला कम्पनीहरू मिलेर बनेको जापानको अटो उद्योग देशको कुल रोजगारीको करिब ८ प्रतिशत हिस्सा ओगट्छ। निर्यातमा देखिएको यो गिरावटले जापानी अर्थतन्त्रलाई मात्र होइन, विश्वव्यापी आपूर्ति शृंखलामा पनि असर गर्ने सम्भावना बढेको छ। भविष्यमा वार्ताले दुवै मुलुकबीचको व्यापार तनाव कम गर्ने कि अझ गहिरो बनाउने भन्ने विषय खुलेर आउन बाँकी छ।