संयुक्त राष्ट्रसङ्घले गाजाको स्थिति हरेक घण्टा झन् जटिल बन्दै गएको चेतावनी दिँदै नागरिकको सुरक्षाका लागि तत्काल प्रभावकारी कदम चाल्न आग्रह गरेको छ। संस्थाले विस्थापन आदेश जारी भएको मात्र कारण देखाएर कब्जा गर्ने पक्ष, विशेषतः इजरायल, नागरिकको सुरक्षाको जिम्मेवारीबाट मुक्त नहुने प्रष्ट पारेको हो।

संयुक्त राष्ट्रसङ्घको मानवीय मामिला समन्वय कार्यालय (ओसिएचए) का अनुसार गाजास्थित अल–रान्तिसी बाल अस्पताल दुई दिनअघि भएको हवाई आक्रमणमा क्षतिग्रस्त भएको छ। अस्पताल आंशिक रूपमा नष्ट भएपछि आधा बिरामी र उनीहरूको हेरचाह गर्ने परिवारजन असुरक्षित अवस्थामा परेको तथ्याङ्क ओसिएचएले सार्वजनिक गरेको छ।

मार्चमा युद्धविराम अन्त्य भएदेखि अहिलेसम्म गाजामा ८० वटा चिकित्सा संरचना र प्राथमिक स्वास्थ्य केन्द्र क्षतिग्रस्त भएको संयुक्त राष्ट्रका मानवीय साझेदारहरूले पुष्टि गरेका छन्। तीमध्ये ६५ सेवा हाल पूर्णरूपमा बन्द छन्। यसबीच, गाजाको दक्षिणी क्षेत्रमा आन्तरिक रूपमा विस्थापित भएकाहरूलाई अस्थायी आवास दिन तीन सहायता केन्द्र स्थापना गरिएको छ।

तर मानवीय प्रयासलाई सहज बनाउनुपर्ने बेला बुधबार राति प्यालेस्टिनी टेलिकम कम्पनीले गाजामा इन्टरनेट सेवा पूर्ण रूपमा बन्द भएको जनाएको छ। यसले बासिन्दा, पत्रकार र मानवीय कार्यकर्तालाई आवश्यक सूचना प्रवाह र आपत्कालीन समन्वयमा गम्भीर असर पारेको छ।

संयुक्त राष्ट्रका साझेदार संस्थाहरूले गाजामा लगातार भइरहेको भारी गोलाबारीले सर्वसाधारण, विशेषगरी बालबालिका, अनाथ र घाइतेहरूलाई असह्य पीडामा धकेलेको उल्लेख गरेका छन्। मानवीय संकटको यो द्रुत विस्तारले दीर्घकालीन राजनीतिक समाधानको आवश्यकता फेरि एकपटक अन्तर्राष्ट्रिय समुदायलाई स्मरण गराएको छ।