एन आई सी एशिया बैंक लिमिटेडले आफ्ना बैंकिङ सम्पत्ति, गैर–बैंकिङ सम्पत्ति र धितोमा रहेका सम्पत्तिको लिलामीबारे विस्तृत विवरण उपलब्ध गराउन अनलाइन पोर्टल सञ्चालनमा ल्याएको जनाएको छ। बैंकले आश्विन १२ मा जारी गरेको विज्ञप्तिअनुसार सो पोर्टलमार्फत लिलामी बिक्रीमा राखिएका सम्पत्तिसम्बन्धी सम्पूर्ण विवरण ग्राहकले एकै ठाउँमा हेर्न सक्ने व्यवस्था गरिएको छ।

बैंकका सहायक प्रमुख कार्यकारी अधिकृत तथा प्रमुख सूचना अधिकारी अर्जुन राज खनियाका अनुसार पोर्टलमा सम्पत्तिको कित्ता नम्बर, क्षेत्रफल, नक्सा, तस्वीर र लोकेशन पहिचानका लागि गुगल म्यापसमेत राखिएको छ। उनले भने, “लिलामी बिक्रीमा राखिएका सम्पत्तिबारे ग्राहकले पूर्ण जानकारी प्राप्त गरी इच्छुक भए थप विवरणका लागि आफ्नो नाम, इमेल, मोबाइल नम्बर र सम्पर्क ठेगाना पठाउन सक्ने सुविधा पनि उपलब्ध गराइएको छ।”

बैंकले लिलामीबारे प्रकाशित सूचनामा रहेको क्यूआर कोड स्क्यान गरेर सो पोर्टलमा प्रवेश गर्न सकिने उल्लेख गरेको छ। नियमित रूपमा अद्यावधिक गरिने यस पोर्टलमार्फत लिलामीमा रहेका सम्पत्तिहरू र अन्य सम्बन्धित सूचनाहरू सहज रूपमा प्राप्त गर्न सकिने बैंकको दाबी छ।

डिजिटल पहुँचलाई प्राथमिकता दिँदै गरिएको यो प्रयासले सम्पत्ति खरिदमा पारदर्शिता बढाउने र इच्छुक ग्राहकलाई आवश्यक सूचनामा सजिलो पहुँच दिने अपेक्षा बैंकले लिएको छ।