नेपाली सेनाले हाल भइरहेको जेनजी आन्दोलनले उत्पन्न गरेको असामान्य परिस्थितिप्रति ध्यानाकर्षण गर्दै संयमता अपनाउन युवाहरूसहित सम्पूर्ण नागरिकलाई अपील गरेको छ। आन्दोलनका क्रममा विभिन्न स्थानमा हिंसात्मक गतिविधि भई देशभर तनावपूर्ण वातावरण सिर्जना भएको सन्दर्भमा सेनाले मंगलबार सार्वजनिक गरेको विज्ञप्तिमा सामाजिक सद्भाव र राष्ट्रिय एकताको संरक्षण अपरिहार्य रहेको उल्लेख छ।

सेनाले जारी गरेको वक्तव्यमा भनिएको छ, “विद्यमान परिस्थितिलाई थप जटिल हुन नदिन सामाजिक सद्भाव तथा राष्ट्रिय एकतालाई कायम राख्दै संयमित हुन नेपाली सेना सम्पूर्ण युवा जनशक्ति र देशवासीलाई हार्दिक अनुरोध गर्दछ।” विज्ञप्तिमा सेना देश र जनताको ज्यान–धनको सुरक्षामा प्रतिबद्ध रहेको स्पष्ट पारिएको छ।

राजनीतिक नेतृत्वमा उत्पन्न शून्यता र जनआन्दोलनको तीव्रतासँगै सुरक्षा निकायहरूमाथि दबाब बढिरहेको अवस्थामा सेनाको यस्तो अपीललाई नागरिकस्तरमा मिश्रित प्रतिक्रिया आउने देखिन्छ। विगतमा पनि संकटपूर्ण अवस्थामा सेनाले स्थायित्व र राष्ट्रिय एकताको पक्षमा वक्तव्य दिने परम्परा कायम गरेको छ।