काठमाडौं — भारतीय प्रधानमन्त्री नरेन्द्र मोदीले नवनियुक्त नेपाली प्रधानमन्त्री केपी शर्मा ओलीलाई बधाइ दिएका छन्। सामाजिक सञ्जाल एक्समा शुभकामना सन्देश दिँदै उनले दुई देशको मित्रतालाई अझ सुदृढ बनाउन चाहेको बताएका छन्।

मोदीले एक्समा लेखेका छन्, ‘प्रधानमन्त्री केपी शर्मा ओलीलाई पुन: प्रधानमन्त्री नियुक्त भएकोमा बधाइ! दुई देशबीचको मित्रताको गहिरो बन्धनलाई अझ सुदृढ गर्न र राष्ट्रका जनताको प्रगति र समृद्धिका लागि सहयोगलाई अझ नजिकबाट विस्तार र सहकार्य गर्न तत्पर छु।’

ओलीको सरकार बनेपछि नेपाल-भारत सम्बन्ध

केपी शर्मा ओलीको सरकार बनेपछि नेपाल-भारत सम्बन्धमा नयाँ चरणको शुरुआत भएको छ। ओली र मोदीको पहिलो संवादमै दुई देशबीचको ऐतिहासिक र सांस्कृतिक सम्बन्धलाई अझ बलियो बनाउन पहल गर्ने प्रतिवद्धता व्यक्त भएको छ। यसअघि पनि ओलीको नेतृत्वमा नेपाल र भारतबीच विभिन्न उच्चस्तरीय भ्रमण र सम्झौताहरू भएका थिए। 

नयाँ सरकारसँगै दुई देशबीच व्यापार, ऊर्जा, यातायात, र सांस्कृतिक आदानप्रदानका क्षेत्रमा सहकार्यलाई अझ विस्तार गर्ने अपेक्षा गरिएको छ। भारतले नेपालको पूर्वाधार विकासमा महत्वपूर्ण सहयोग गर्दै आएको छ, र ओलीको नयाँ कार्यकालमा पनि यो सहयोग जारी रहने विश्वास छ।

यसअघि नेपालमा भारतले पारेको प्रभावलाई नियन्त्रण गर्ने प्रयासमा ओली सरकारले चीनसँग पनि निकट सम्बन्ध स्थापित गरेको थियो। यसपटक पनि ओलीको सरकारले दुई ठूला छिमेकी देशहरूसँग सन्तुलित र मैत्रीपूर्ण सम्बन्ध कायम गर्ने लक्ष्य राखेको छ।