काठमाडौं । नबिल बैंकले आफ्नो चर्चित Nabil School of Social Entrepreneurship (Nabil SSE) फेलोसिप कार्यक्रमको चौथो चरणका लागि आवेदन खुला गरेको छ। सामाजिक परिवर्तनका लागि नवीनतम सोच भएका युवाहरूको लागि यो कार्यक्रम एक सुनौलो अवसर हुन सक्छ। १८ वर्षभन्दा माथिका नेपाली नागरिकहरूले आगामी भदौ १४ गते सम्म आवेदन दिन सक्नेछन्।

यस कार्यक्रमले कृषि, पर्यटन, ऊर्जा, वातावरण संरक्षण, र सूचना प्रविधि लगायतका क्षेत्रहरूमा उद्यम गर्न चाहनेलाई आवश्यक सीप तथा तालिम प्रदान गर्नेछ। नबिल बैंकले यस कार्यक्रमलाई आफ्नो संस्थागत सामाजिक उत्तरदायित्वअन्तर्गत सञ्चालन गर्दै आएको छ। इच्छुक व्यक्तिहरूले अनलाइन फारम भरेर वा क्युआर कोड स्क्यान गरेर आवेदन दिन सक्नेछन्।

नबिल बैंकले त्रिभुवन विश्वविद्यालय व्यवस्थापन संकायअन्तर्गतको स्कुल अफ म्यानेजमेन्टको सहकार्यमा ६ महिना लामो आवासीय र प्रयोगात्मक ढाँचामा सञ्चालन हुने यस कार्यक्रममार्फत सहभागीहरूलाई सामाजिक उद्यमको सम्पूर्ण व्यावसायिक चक्रमा आवश्यक तालिम दिनेछ।

हालसम्म, यो कार्यक्रममार्फत ५६ जना सामाजिक उद्यमीले तालिम प्राप्त गरिसकेका छन्, जसमध्ये ८० प्रतिशतले सफलतापूर्वक उद्यम स्थापना गरेका छन्। यसले ११ सय ८४ रोजगारीका अवसरहरू सिर्जना गर्न मद्दत गरेको छ।

नबिल बैंक नेपालको अग्रणी वाणिज्य बैंकहरूमध्ये एक हो, जसले २४ लाख भन्दा बढी सेवाग्राहीलाई २६८ शाखा र ३१६ एटिएममार्फत सेवा प्रदान गर्दै आएको छ। ४० वर्षको अनुभवसँगै, नबिल बैंकले नेपालको बैंकिङ क्षेत्रमा महत्वपूर्ण योगदान पुर्‍याउँदै आएको छ।

अब, तपाईँको नयाँ सोचलाई वास्तविकतामा बदल्न यो मौका नछुटाउनुहोस्!