जेन–जी आन्दोलनका प्रतिनिधिहरूले आगामी फागुन २१ गते निर्धारित प्रतिनिधिसभा निर्वाचनमा सबै राजनीतिक दल र सरोकारवाला पक्षलाई भाग लिन आग्रह गरेका छन्।

शुक्रबार राष्ट्रपति भवन शीतल निवासमा प्रधानमन्त्री सुशीला कार्की र मन्त्रिपरिषद्का सदस्यहरूसँग भएको छलफलपछि आन्दोलनका प्रतिनिधिहरूले पत्रकारहरूसँग कुरा गर्दै लोकतान्त्रिक अभ्यासलाई निरन्तरता दिन सबै दलहरूको सहभागिता अपरिहार्य रहेको बताएका हुन्।

जेन–जी  आन्दोलनका प्रतिनिधि मिराज ढुंगानाले निर्वाचन जनताको मतका माध्यमबाट जनप्रतिनिधि चयन गर्ने लोकतान्त्रिक प्रक्रिया भएकाले यसलाई कसैले रोक्न नहुने बताए। उनका शब्दमा, “निर्वाचनमा सबै दलहरू आइदिनुहोस्, यो जनताको अधिकार हो। जनताले जसलाई रोज्छ, उसैले शासन गर्ने हो। निष्पक्ष प्रतिस्पर्धामार्फत नयाँ शक्ति पनि उदाउन सक्छ।”

ढुंगानाले वर्तमान मन्त्रिपरिषद्मा सडक आन्दोलनलाई संस्थागत रूप दिन योगदान गरेका व्यक्तिहरूलाई समेट्नुपर्ने स्पष्ट धारणा पनि व्यक्त गरे। उनका अनुसार, “सडक आन्दोलनका आधारमा बनेको यो अन्तरिम व्यवस्थाले अब समावेशी र उत्तरदायी सरकारको अभ्यास गर्नुपर्छ।”

यसअघि राष्ट्रपति रामचन्द्र पौडेलको आह्वानमा अघिल्लो संसदमा प्रतिनिधित्व गरेका दलका शीर्ष नेताहरू र सरकारबीच निर्वाचनका तयारीबारे व्यापक छलफल भएको थियो। स्रोतका अनुसार, दलहरूले चुनावका लागि शान्ति, सुरक्षा र स्वतन्त्र राजनीतिक वातावरण सुनिश्चित गर्न सरकारसँग माग गरेका थिए।

सरकारका तर्फबाट प्रधानमन्त्री कार्कीले लोकतान्त्रिक प्रक्रियाको निरन्तरताका लागि सबै राजनीतिक शक्तिहरूको सहभागिता आवश्यक रहेको बताउँदै, “सरकारले निष्पक्ष र व्यवस्थित निर्वाचनका लागि पूर्ण प्रतिबद्धता जनाइसकेको छ,” भन्ने सन्देश दिइन्।

जेन–जी  आन्दोलनबाट उत्पन्न अन्तरिम राजनीतिक अवस्थाले नयाँ दलहरू र स्वतन्त्र समूहहरूलाई पनि चुनावमा प्रवेश गर्ने अवसर दिएको छ। अब प्रश्न यही हो—राजनीतिक रूपान्तरणका यो क्षणलाई पुराना र नयाँ दुवै शक्तिले कसरी सदुपयोग गर्छन् भन्नेमा देशको निकट भविष्य निर्भर रहनेछ।