मनाङको नासोँ गाउँपालिकाका दुई वडालाई जोड्ने दूधखोला पुल अखेर नौ वर्षपछि सञ्चालनमा आएको छ। लामो समयदेखि अधूरो अवस्थामा रहेको यस मोटरेबल पुलले अहिले गाउँका बासिन्दा, विद्यार्थी र बिरामीका लागि राहत र सुगमता ल्याएको छ।

दूधखोलामाथि पर्ने यो पक्की पुल नासोँ गाउँपालिकाको थोँचे (वडा नं. ६) र तिल्चे (वडा नं. ७) जोड्ने प्रमुख मार्ग हो। स्थानीय बासिन्दाका अनुसार, पुल नहुँदा बालबालिकाले दैनिक विद्यालय पुग्न जोखिमपूर्ण ढंगले खोलो तर्नु पर्ने बाध्यता थियो। अहिले पुल सञ्चालनमा आएपछि करिब तीन सय विद्यार्थी नियमित रूपमा विद्यालय पुग्न सक्ने भएका छन्।

पुल निर्माणका लागि २०७३ असार २० गते एमएस सञ्जीवनी खड्का कृष्णा र द क्याराभान कम्पनीले संयुक्त रूपमा ठेक्का सम्झौता गरेका थिए। सम्झौताअनुसार २०७४ मंसिर २३ भित्र काम सम्पन्न गर्नुपर्ने भए पनि ठेकेदारले केवल ३० प्रतिशत काम गरेर सम्पर्कविहीन भएका थिए। त्यसपछि पटक–पटक म्याद थपिँदै गएको भए पनि काम अघि बढेन।

संघीयता लागू भएपछि पुलको स्वामित्व जिल्ला विकास समितिबाट पूर्वाधार विकास कार्यालयमा सरेको थियो। त्यसपछि क्रमशः २०७७ असार २९ र २०७८ चैत मसान्तसम्म म्याद थपिए पनि पुल अधुरै रह्यो। स्रोतका अनुसार ठेकेदारले दुईतर्फका पिल्लर मात्रै निर्माण गरेर करिब दुई करोड रुपैयाँ निकासा भुक्तानी गरिसकेका थिए।

लामो स्थगनपछि क्याराभान कम्पनीका अध्यक्ष चन्द्र थकालीले गत असारमा पुल सक्ने प्रतिबद्धता जनाएका थिए। निरन्तर कामपछि पुल यही असार मसान्तभित्र निर्माण सम्पन्न भई दशैंलगत्तै सञ्चालनमा आएको उनले बताए।

नासोँ गाउँपालिकाका अध्यक्ष धनबहादुर गुरुङका अनुसार, पुल सञ्चालनले न केवल स्थानीय बासिन्दा, विद्यार्थी र सेवाग्राहीलाई सहज बनाएको छ, तर यो क्षेत्र हुँदै काङ्ला पास जाने पर्यटकका लागि पनि नयाँ सुविधा थपिएको छ। उनले भने, “दूधखोलाको पुलले केवल आवतजावत सहज बनाएको होइन, यसले मनाङको जीवनशैलीमै सहजता ल्याएको छ।”

थोँचेकी विद्यार्थी सुस्मिता गुरुङले भनिन्, “पहिले बिहानै विद्यालय जान डर लाग्थ्यो, अहिले पुल बनेपछि खुशी लागेको छ।” सुस्मिता जस्तै सयौं विद्यार्थी र बासिन्दाका अनुहारमा अहिले सन्तोष झल्किएको छ।

नौ वर्ष लामो प्रतीक्षा र अनगिन्ती म्याद विस्तारपछि बनेको यो पुल केवल पूर्वाधारको उपलब्धि होइन—यो मनाङको दैनिकीमा फर्किएको विश्वास र धैर्यको प्रतीक बनेको छ।