नेपाली कांग्रेसभित्र पुनर्संरचना र आन्तरिक सुधारको माग सशक्त रूपमा उठ्न थालेको छ। ओखलढुंगाका २७ जना महाधिवेशन प्रतिनिधिमध्ये ११ जनाले पार्टीको विशेष महाधिवेशन आह्वान गर्न नेतृत्वलाई औपचारिक मागपत्र बुझाएका छन्। उनीहरूले यो पहललाई “जेन–जी  पुस्ताको भावना अनुसार कांग्रेसलाई पुनःनिर्माण गर्ने” कदमका रूपमा प्रस्तुत गरेका छन्।

विशेष महाधिवेशनको मागमा हस्ताक्षर गर्नेहरूमा कुमार लुईटेल, रुद्रप्रसाद अधिकारी, सविता राई, सर्वधन तामाङ, हरिप्रसाद दाहाल, बेदबहादुर रोक्का, कुमार बहादुर श्रेष्ठ, प्रकाश दाहाल, दुर्गा कुमारी तामाङ, होम बहादुर विक र अर्चना लुईटेल रहेका छन्। उनीहरूले कांग्रेसको हालको संरचना र नीतिगत दिशालाई नयाँ पुस्ताको अपेक्षाअनुसार परिमार्जन गर्नुपर्ने बताउँदै विशेष महाधिवेशन नै त्यसको प्रभावकारी माध्यम हुने धारणा दिएका छन्।

केन्द्रीय सदस्यद्वय रामहरि खतिवडा र प्रदिप सुनुवार सहितका १६ जनाले भने अहिलेसम्म हस्ताक्षर नगरेका छन्। तर पहलकर्ता कुमार लुईटेलका अनुसार, “विशेष महाधिवेशनको पक्षमा उभिने प्रतिनिधिको संख्या थपिने सम्भावना खुला छ।”

ओखलढुंगाबाट सुरु भएको यो पहल कांग्रेसभित्र पछिल्ला महाधिवेशनपछिको असन्तुष्टि र सुधारको मागको निरन्तरता हो। पार्टीका केही नेताहरूले यो कदमलाई स्थानीयस्तरमा संगठन सुदृढीकरण र नयाँ पुस्ताको प्रतिनिधित्व सुनिश्चित गर्ने प्रयासका रूपमा व्याख्या गरेका छन्।

गत भदौमा भएको जेन–जी  आन्दोलनपछि कांग्रेस र अन्य दलभित्र पनि संरचनागत सुधार र नेतृत्व पुस्तान्तरणको आवाज तीव्र भएको देखिन्छ। विश्लेषकहरूका अनुसार, ओखलढुंगाबाट सुरु भएको यो आन्तरिक दबाबले पार्टीभित्र दीर्घकालीन नीतिगत पुनर्विचार र नेतृत्वमा पुस्ता सन्तुलनको बहस अझ बलियो बनाउन सक्छ।