काठमाडौं । नेपाल ल्यूब आयल लिमिटेडको ३४औं वार्षिक साधारण सभा हालै सम्पन्न भएको छ, जसमा कम्पनीले चालु वर्षका लागि शेयरधनीहरूलाई २१ प्रतिशत लाभांश वितरण गर्ने प्रस्ताव पारित गरेको छ। प्रस्ताव अनुसार, २० प्रतिशत बोनस शेयर र १.०५२६४ प्रतिशत नगद लाभांश प्रदान गरिनेछ।

सभामा अध्यक्ष अरुणकुमार चौधरी, प्रमुख कार्यकारी अधिकृत करण चौधरी, सञ्चालक समिति, कम्पनी सचिव, लेखा परीक्षक, व्यवस्थापन टोलीका सदस्य र शेयरधनीहरू सहभागी थिए। कम्पनीका अनुसार, ८४.८६ प्रतिशत शेयरधनी उपस्थिति रहेर सभामा सहभागिता जनाएका थिए।

अध्यक्ष चौधरीले सभालाई सम्बोधन गर्दै भने, “विभिन्न चुनौतीपूर्ण आर्थिक अवस्थाबीच पनि कम्पनीले लक्ष्यप्रति दृढता देखाउँदै निरन्तर वृद्धि हासिल गरेको छ। यो सफलताको श्रेय समर्पित कर्मचारी, व्यवस्थापन टोली, सञ्चालक समिति र शेयरधनीहरूको विश्वासलाई जान्छ।” उनका अनुसार, कम्पनीले आगामी वर्षहरूमा पनि पारदर्शिता, गुणस्तर र दिगोपनका सिद्धान्तमा आधारित रही अघि बढ्ने लक्ष्य लिएको छ।

विगत १०–१२ वर्षयता कोभिड–१९ महामारी र आर्थिक मन्दीबाहेक नेपाल ल्यूब आयलले प्रत्येक वर्ष उच्च प्रतिफल वितरण गर्दै आएको छ। शेयरधनीहरूले कम्पनीको पारदर्शी व्यवस्थापन, आर्थिक अनुशासन र दीर्घकालीन दृष्टिकोणको सभामा प्रशंसा गरेका थिए।

नेपाल ल्यूब आयल लिमिटेडले गल्फ आयल इन्टरनेशनलको प्रत्यक्ष प्राविधिक सहयोगमा नेपालमै ‘गल्फ’ ब्रान्डका लुब्रिकेन्ट उत्पादन र वितरण गर्दै आएको छ। विश्वप्रसिद्ध गल्फ ब्रान्डले अटोमोबाइल र औद्योगिक मेसिनरीका लागि आवश्यक विभिन्न किसिमका लुब्रिकेन्ट उपलब्ध गराउँदै आएको छ, जसले नेपाली बजारमा गुणस्तरीय र विश्वसनीय उत्पादनको पहिचान कायम गरेको कम्पनीले जनाएको छ।

कठिन आर्थिक परिवेशबीच पनि कम्पनीले देखाएको स्थायित्व र शेयरधनीप्रतिको प्रतिबद्धताले नेपाल ल्यूब आयललाई निजी क्षेत्रको सफल मोडलका रूपमा स्थापित गरेको देखिन्छ-जहाँ नाफाभन्दा बढी पारदर्शिता र विश्वासलाई प्राथमिकता दिइएको छ।