नेपाली कांग्रेसले पार्टीका वरिष्ठ नेता र पूर्वमन्त्री ऋषिकेश गौतमको निधनप्रति श्रद्धाञ्जलि व्यक्त गर्दै केन्द्रीय कार्यसमितिको बैठक कात्तिक १३ गतेसम्म स्थगित गरेको छ। पार्टीका मुख्यसचिव कृष्णप्रसाद पौडेलका अनुसार शनिबार बसेको बैठकले गौतमको योगदान स्मरण गर्दै शोक प्रस्ताव पारित गरेको हो।

८४ वर्षीय गौतमको असोज ३१ गते राति ९:१५ बजे काठमाडौँको पेप्सीकोलास्थित निजी निवासमा निधन भएको थियो। बारामा जन्मिएका उनी नेपाली कांग्रेसका प्रारम्भिक संगठनकर्तामध्ये एक हुन्। उनले विसं २०३६ देखि २०४८ सम्म कांग्रेस बारा जिल्ला सभापतिको जिम्मेवारी सम्हालेका थिए। त्यसपछि २०४८ र २०५६ सालमा बारा क्षेत्र नं. ३ बाट प्रतिनिधिसभा सदस्य निर्वाचित भएका थिए। साथै, उनी पार्टीको संसदीय दलका सचिवका रूपमा पनि रहे।

नेपाल विद्यार्थी सङ्घका संस्थापक केन्द्रीय सदस्यसमेत रहेका गौतमले लोकतान्त्रिक आन्दोलनका विभिन्न चरणमा अग्रपङ्तिमा रहेर भूमिका खेलेका थिए। राणा शासनपछिको लोकतन्त्र स्थापनादेखि पुनःस्थापनासम्मका आन्दोलनमा उनले पटक–पटक जेलजीवन व्यतित गर्नुपरेको थियो। पार्टीका मुख्यसचिव पौडेलले भने, “गौतमजीले आफ्नो जीवन पार्टी, देश र लोकतान्त्रिक मूल्यका लागि समर्पित गर्नुभयो। उहाँको निधनले कांग्रेसले एक अग्रज र निष्ठावान् नेतृत्व गुमाएको छ।”

कांग्रेसले उनको सम्मानमा तीनदिने शोक अवधि घोषणा गरेको छ। सो अवधिमा कात्तिक १, २ र ३ गते केन्द्रीय, प्रदेश र जिल्ला कार्यालयहरूमा पार्टीको झण्डा आधा झुकाइनेछ। कात्तिक २ गते सबै पार्टी कार्यालय बन्द रहने र स्वर्गारोहणको १३ दिनसम्म शोक पुस्तिका राखिने निर्णय गरिएको छ। सम्बन्धित जिल्लामा १३औँ दिन श्रद्धाञ्जलि सभा आयोजना गरिने पार्टीले जनाएको छ।

गौतमको राजनीतिक यात्रा नेपाली कांग्रेसको संगठनात्मक इतिहाससँग गहिरो रूपमा जोडिएको छ। उनको योगदान र आदर्शप्रति पार्टीभित्र मात्र होइन, लोकतान्त्रिक आन्दोलनका समग्र अध्यायमा पनि सम्मानपूर्वक स्मरण गरिँदैछ। आगामी पुस्ताका लागि उनको जीवन, संघर्ष र निष्ठा लोकतान्त्रिक मूल्य र सेवा भावको उदाहरण बनेर रहिरहने अपेक्षा गरिएको छ।