काठमाडौंको सातदोबाटोमा सोमबार साँझ नागरिक उड्डयन प्राधिकरणका महानिर्देशक प्रदीप अधिकारीमाथि कुटपिट भएको छ। ललितपुर प्रहरीले केही अपरिचित युवाहरूले ‘जेन–जि’ समूहको नाममा अधिकारीमाथि आक्रमण गरेको पुष्टि गरेको छ।

ललितपुर महानगर प्रहरी परिसरका प्रमुख एसएसपी होबिन्द्र बोगटीका अनुसार घटनाको अनुसन्धान सुरु गरिएको छ। उनले भने, “घटनाको प्रकृति बुझ्न र संलग्न व्यक्तिहरूको पहिचानका लागि टोली परिचालन गरिएको छ।” अधिकारीको स्वास्थ्य अवस्था सामान्य रहेको र थप विवरण संकलन भइरहेको प्रहरीले जनाएको छ।

केही दिनअघि पनि केही युवाहरू ‘जेन–जि’ परिचयमा प्राधिकरण कार्यालयमै पुगेका थिए। तीमध्ये अर्जुन शाही नामक एक व्यक्तिलाई प्रहरीले पक्राउ गरेको थियो। अनुसन्धानका क्रममा शाहीमाथि विभिन्न मुद्दा दर्ता रहेको जानकारी सार्वजनिक भएको थियो।

अधिकारीमाथिको पछिल्लो आक्रमणले जेन–जि आन्दोलनपछि देखा परेका स्वतःस्फूर्त अभियान र हिंसात्मक घटनाबीचको सीमारेखा फेरि अस्पष्ट बनाएको देखिन्छ। राजनीतिक संक्रमण र आस्थाको पुनर्संरचनाको घडीमा सार्वजनिक निकायका शीर्ष पदाधिकारीमाथि यसरी आक्रमण हुनु सुरक्षा र उत्तरदायित्व दुवै पक्षका लागि गम्भीर प्रश्न बनेको छ।