भोजपुरको टेम्केमैयुङ गाउँपालिका–४ का ४० वर्षीय सचिन राईलाई प्रहरीले भरुवा बन्दुकसहित पक्राउ गरेको छ। इलाका प्रहरी कार्यालय दिल्पाबाट खटिएको टोलीले उनलाई गए राति साढे ८ बजे मध्यपहाडी लोकमार्गको हर्कटे सामुदायिक वनस्थित आम्लाला टोलबाट नियन्त्रणमा लिएको हो।

जिल्ला प्रहरी कार्यालय भोजपुरका सूचना अधिकारी दीपककुमार श्रेष्ठका अनुसार राईको साथबाट बारुद लोड गरिएको एक थान भरुवा बन्दुक, दापसहितको खुकुरी, ९ वटा धातुको ठूला छर्रा, ३८ वटा साना छर्रा, करिब १६० ग्राम बारुदजस्तो कालो धुलो, सलाईका दुई बट्टा र चार थान केप बरामद गरिएको छ।

प्रहरीले घटनास्थलमै प्रारम्भिक सोधपुछ गर्दा राईले जंगलमा आफ्ना भेडा जङ्गली जनावरले आक्रमण गर्न थालेपछि सुरक्षाका लागि बन्दुक बोक्ने गरेको स्वीकार गरेका छन्। सूचना अधिकारी श्रेष्ठका अनुसार, “राईले आफ्नो र गोठका पशुहरूको सुरक्षाका लागि मात्र बन्दुक बोक्ने बताएको बताएका छन्।”

प्रहरीले बरामद हतियार र सामग्रीसहित उनलाई नियन्त्रणमा लिएर थप अनुसन्धान अघि बढाएको छ। प्रारम्भिक अनुमानमा यो हतियार घरेलु रूपमा बनाइएको पुरानो भरुवा बन्दुक भएको र आवश्यक प्रमाण संकलनपछि हतियार ऐनअन्तर्गत मुद्दा दर्ता गरिने तयारी भइरहेको प्रहरीले जनाएको छ।

पछिल्ला वर्षहरूमा भोजपुर लगायतका पहाडी जिल्लामा वन क्षेत्रमा अवैध हतियार बोक्ने र स्थानीय सुरक्षाको नाममा प्रयोग हुने घटनामा वृद्धि देखिएको प्रहरीले जनाएको छ। यस घटनाले ग्रामीण क्षेत्रमा हतियार नियन्त्रण र सुरक्षाबारे जनचेतना अभिवृद्धि गर्ने आवश्यकता फेरि उजागर गरेको छ।