सर्लाहीको धनकौलमा मनुष्मारा खोलाले बगाएर बेपत्ता भएकी ११ वर्षीया बालिका पाँच दिनपछि मृत फेला परेकी छन्। जिल्ला प्रहरी कार्यालय सर्लाहीका अनुसार धनकौल गाउँपालिका–५ हरकठवाकी सोनीकुमारी साह असोज ३० गते दिउँसो नुहाउन गएका बेला खोलाले बगाएकी थिइन्।

घटनास्थल धनकौल–३ बाट झण्डै १० किलोमिटर दक्षिणतर्फ रामनगर गाउँपालिका–७ पछियारी टोल नजिक मनुष्मारा खोलामै उनको शव मंगलबार बिहान स्थानीयले देखेपछि प्रहरीलाई खबर गरिएको थियो।

प्रहरीका प्रवक्ता तथा डिएसपी सरोज राईका अनुसार शवको सनाखत मृतकका दाजु चन्दन साहले गरेका हुन्। राईले भने, “शवलाई प्रादेशिक अस्पताल मलङ्गवामा पोष्टमार्टमका लागि लगिएको छ।”

बालिकाको खोजीका लागि असोज ३१ र कात्तिक १ गते सशस्त्र प्रहरी बल बर्दिवासस्थित बाहिनीबाट गोताखोर टोली समेत परिचालन गरिएको थियो। दुई दिनसम्मको प्रयासपछि पनि पत्ता नलागेपछि टोली फर्किएको थियो।

लगातारको वर्षा र खोलामा पानीको वेग बढेकाले खोजी कठिन बनेको प्रहरीको भनाइ छ। पाँच दिनपछि बालिकाको शव भेटिएपछि स्थानीयवासीले दु:ख व्यक्त गर्दै मनुष्मारा क्षेत्रमा बालबालिकाको सुरक्षा र चेतनामूलक कार्यक्रम आवश्यक भएको टिप्पणी गरेका छन्।

सामान्य वर्षातमै जोखिमपूर्ण बन्ने मनुष्मारा खोलाले विगत वर्षहरूमा पनि ज्यान लिँदै आएको स्थानीय तथ्याङ्कले देखाउँछ — यसपटकको घटना पुनः त्यही चेतावनीको स्मरण बनेको छ।