काठमाडौं । नेपाल आजसँगको विशेष अन्तरवार्तामा राजनीतिक विश्लेषक हरिराम रिमालले जेनजी आन्दोलनलाई नेपाली जनताले अनुमोदन गर्ने ठोकुवा गरेका छन्। उनका अनुसार, यस आन्दोलनको लिगेसी बोक्ने दल निकट भविष्यमा नेपालको सबैभन्दा ठूलो दलका रूपमा स्थापित हुने निश्चित देखिन्छ।

रिमालले ऐतिहासिक उदाहरण स्मरण गर्दै भने, “२०१५ सालको आन्दोलनपछि नेपाली कांग्रेसलाई ठूलो दलका रूपमा अनुमोदन गरिएको थियो। २०६२/६३ को आन्दोलनपछि विद्रोही माओवादीलाई नेपाली जनताले पहिलो संविधानसभामा ठूलो शक्तिको रूपमा अनुमोदन गरे। त्यसैगरी, मधेश आन्दोलनलाई पनि जनताले अनुमोदन गरेर मधेसी जनहितकार फोरम र तराई मधेश लोकतान्त्रिक पार्टीलाई स्थापित गरे।”

उनले जेनजी आन्दोलनलाई पनि नेपाली जनताले त्यस्तै स्वरूपमा स्वीकार्ने दाबी गरे। “कम्तीमा एउटा निर्वाचनमा यो आन्दोलनको लिगेसी बोकेर आएको दल बहुमत ल्याउला–नल्याउला तर ठूलो दल बन्ने कुरा निश्चित छ,” रिमालले स्पष्ट पारे।

उनका अनुसार, पुराना दलका नेताहरू—केपी शर्मा ओली, शेरबहादुर देउवा र पुष्पकमल दाहाल प्रचण्ड—लाई पनि थाहा छ कि उनीहरू अब सजिलै सत्तामा फर्कन सक्दैनन्। तर, आफ्ना कार्यकर्तालाई एकताबद्ध राख्न र आन्तरिक विवाद व्यवस्थापन गर्न ती नेताहरू “विदेशी शक्तिको घेराबन्दी” वा “पुनः सत्तामा फर्कने” जस्ता भ्रमपूर्ण संदेश दिइरहेका छन्।

रिमालले निष्कर्ष निकाले, “पुराना दल सत्तासँग टाँसिएका भए पनि उनीहरूको पुनः उदय सहज छैन। नेपालका नागरिकहरूले नयाँ आन्दोलनलाई अनुमोदन गरेर नयाँ शक्ति स्थापित गर्ने संकेत देखाइरहेका छन्।”

👉 नेपाल आजका स्तम्भकार हरिराम रिमालको पूर्ण अन्तरवार्ता हेर्न नेपाल आजको युट्युब च्यानल मा जान सकिन्छ।

hariram rimal gen z