प्रचण्डको आदेश: कार्तिक ३० भित्र सबै कार्यकर्ता मतदाता नामावलीमा खटिनुहोस्!
नेपाल कम्युनिष्ट पार्टी (माओवादी केन्द्र) ले आगामी निर्वाचन तयारीलाई सुदृढ बनाउने उद्देश्यसहित देशभरका आफ्ना संगठनलाई मतदाता नामावली अद्यावधिकमा विशेष सक्रियता देखाउन निर्देशन दिएको छ ।
पार्टीका महाधिवेशन आयोजक समिति संयोजक पुष्पकमल दाहाल ‘प्रचण्ड’ले जारी गरेको परिपत्रमा माओवादी कार्यकर्तालाई निर्वाचन कार्यालयहरूसँग समन्वय गरी नामावली अद्यावधिक प्रक्रियामा सहभागी हुन आग्रह गरिएको छ । परिपत्रमा १६ वर्ष उमेर पूरा गरेका नागरिकहरूको नाम आगामी कार्तिक ३० गतेभित्र मतदाता सूचीमा समावेश गराउन, विवाह वा बसाइँ सराइका कारण मतदान केन्द्र परिवर्तन आवश्यक परेमा त्यसको प्रक्रिया पूरा गर्न, र नाम, जन्ममिति वा अन्य विवरणमा त्रुटि भए सच्याउन पनि निर्देशन गरिएको छ ।
प्रचण्डले जारी गरेको परिपत्रमा भनिएको छ, “निर्वाचनमा सहभागी हुने जनताको नामावली अद्यावधिक गर्नु लोकतान्त्रिक अभ्यासको पहिलो खुड्किलो हो । त्यसैले सम्पूर्ण पार्टी पङ्क्तिले यो कार्यलाई गम्भीरतापूर्वक लिई आवश्यक समन्वय र सहजीकरण गर्नुपर्छ ।”
माओवादी केन्द्रको यो कदम निर्वाचन आयोगले हालै सुरु गरेको नामावली अद्यावधिक कार्यक्रमसँग मेल खाने गरी अघि बढाइएको बताइएको छ । पार्टीले यसलाई संगठन सुदृढीकरण र जनसंपर्क विस्तारसँग पनि जोडेर हेरेको छ ।
राजनीतिक रूपमा आगामी निर्वाचन नजिकिँदै गर्दा माओवादी केन्द्रले मतदाता सूची अद्यावधिकलाई संगठनभित्रको अनुशासन र जनसंपर्क दुवैका रूपमा उपयोग गर्न खोजेको देखिन्छ । यसले स्थानीय तहदेखि केन्द्रसम्म पार्टी कार्यकर्तामा चुनावी तयारीको लय पुनः सक्रिय बनाउने संकेत दिएको छ ।
