वीरगञ्ज – जनमत पार्टीका अध्यक्ष डा. सिके राउतले नेपाली कांग्रेस र नेकपा एमालेलाई देशमा दुई पार्टीबाहेक अरू कुनै पार्टीको अस्तित्व नहोस् भन्ने चाहना राखेको आरोप लगाएका छन्। बाराको फेटा गाउँपालिकामा सोमबार आयोजित पार्टी प्रवेश कार्यक्रममा बोल्दै राउतले यी दलहरूको बहुदलीय लोकतन्त्रको विरुद्ध षडयन्त्रको आरोप लगाएका हुन्।

उनले भने, "कांग्रेस र एमालेले जानाजानी यस्तो नियम बनाउने कोशिष गर्दैछन् जसले देशमा दुई पार्टी बाहेक अरूलाई अस्तित्व नदिन सकोस्। यसलाई हामी सबैले सचेत रहेर विरोध गर्नुपर्छ।" राउतले थपे, "हामीलाई बहुदलीय व्यवस्था चाहिन्छ, दुई दलवाला होइन।"

कार्यक्रममा उनले संघीयताको फाइदासमेत प्रस्तुत गरे, र भने, "सात वर्षमै संघीयता सफल बनाउने काम भएको छ, जुन पहिले सय वर्षमा पनि सम्भव थिएन। अहिले गाउँ गाउँमा सडक निर्माण भइरहेको छ, जुन संघीयताको परिणाम हो।"

मधेसमा दलित, मुस्लिम र मुसहर समुदायलाई भूमि नदिएको र पहाडबाट लाखौं मानिसलाई ल्याएर भूमि बाँड्ने षडयन्त्र भइरहेको उनले आरोप लगाए। यसका साथै, राउतले प्रदेश सरकारलाई आलोचना गर्दै सिरहाकी बलात्कार पीडित रिंकु सदालाई न्याय नदिएको कारण प्रदेश सरकारलाई थप अधिकार दिनुपर्ने सुझाव दिए।

उनले प्रत्यक्ष निर्वाचित प्रधानमन्त्री र राष्ट्रपति हुनुपर्ने कुरामा जोड दिँदै भने, "देशको भविष्यका लागि यी कदमहरू आवश्यक छन्।" कार्यक्रमको समापनमा विभिन्न पार्टीका नेता कार्यकर्ताहरू जनमत पार्टीमा सामेल भए, जसलाई राउतले फूलमाला लगाएर स्वागत गरे।