तानसेनमा भलिबलको तुफान: रणउजिरेश्वरी कपमा पैसा, प्रतिष्ठा र ‘कडा भिडन्त’को खेल
तानसेनमा ऐतिहासिक रणउजिरेश्वरी भगवती जात्राको अवसर पारेर बिहीबारदेखि ‘दोस्रो रणउजिरेश्वरी भगवती कप–२०८२’ औपचारिक रूपमा सुरु भएको छ। श्रीनगर भलिबल क्लबको आयोजनामा भएको यो प्रतियोगितामा पुरुष र महिला दुवै समूहमा पाँच–पाँच टोली सहभागी छन्। उद्घाटन दिनको खेलमा महिला तर्फको पहिलो लिग चरणमा न्यू होराइन क्लब तानसेनले आयोजक श्रीनगर भलिबल क्लबलाई २–० को सोझो सेटमा हरायो। त्यसपछि चण्डेश्वरी युवा क्लब, रिब्दीकोट–६ ले निस्दी भलिबल क्लबमाथि पनि २–० को जित हात पार्यो। तेस्रो खेलमा न्यू होराइजन तानसेनले कानुङ्ग मगर भलिबल क्लबलाई २–० को सेटमा पराजित गर्यो।
पुरुषतर्फको उद्घाटन खेलमा पाल्पा भलिबल क्लबले न्यू होराइजन भलिबल क्लबलाई ‘बेस्ट अफ फाइभ’ प्रारूपमा ३–१ को सेट जितसँगै प्रारम्भिक विजय दर्ता गर्यो। आयोजक क्लबका अध्यक्ष कृष्ण बहादुर आलका अनुसार प्रतियोगितामा पुरुष वर्गका प्रथम, द्वितीय, तृतीय र सान्त्वना स्थान प्राप्त गर्नेले क्रमशः एक लाख ७५ हजार, एक लाख २५ हजार, ६० हजार र ३० हजार रुपैयाँसहित मेडल र प्रमाणपत्र पाउनेछन्। महिला वर्गमा प्रथम हुने टोलीलाई ३० हजार, द्वितीयलाई २० हजार, तृतीयलाई १० हजार र सान्त्वनालाई पाँच हजार रुपैयाँ पुरस्कार रहनेछ।
खेल संयोजक तथा क्लबका सचिव दीपक चौहानका अनुसार, विभिन्न विद्यामा उत्कृष्ट प्रदर्शन गर्ने खेलाडीहरूलाई पनि सम्मान गरिनेछ। सम्पूर्ण पुरस्कार र व्यवस्थापनसहित प्रतियोगिता सञ्चालनका लागि १८ लाख २८ हजार ६ सय रुपैयाँ खर्च हुने अनुमान गरिएको छ। तानसेनको खेल संस्कृति र स्थानीय सहभागितालाई बलियो बनाउने उद्देश्यका साथ यो प्रतियोगिता अगाडि बढाइएकाले यसले खेलाडीहरूको मनोबल मात्र होइन, नगरको सामुदायिक ऊर्जा पनि बढाउने अपेक्षा गरिएको छ।
