जंगी अड्डामा अनौठो दृश्य: भारतले सेनालाई कुकुर, घोडा र गाडी थमायो!
भारतका परराष्ट्र सचिव विक्रम मिस्रीले सोमबार काठमाडौंस्थित जंगी अड्डामा आयोजित विशेष समारोहमार्फत नेपाली सेनालाई विभिन्न सामग्री हस्तान्तरण गरेका छन्। उनले प्रधान सेनापति सुव्रवल जनसेवाश्री अशोकराज सिग्देललाई हल्का प्रहार गर्ने गाडी, अत्यावश्यक उपचारका उपकरण, दुई सैनिक कुकुर र छ घोडा औपचारिक रूपमा हस्तान्तरण गरे।
भारतीय दूतावासले सार्वजनिक गरेको जानकारीअनुसार, यो सहयोग दुई सेनाबीचको दीर्घकालीन विश्वास, साझेदारी र नजिकको सम्बन्धलाई अझ प्रष्ट पार्ने खालको छ। मिस्रीले हस्तान्तरण कार्यक्रममा यो सहकार्यले दुई देशका सेनाबीचको रक्षा सहकार्यलाई मजबुत बनाउने मात्र नभई मित्रता र विश्वासको आत्मालाई पनि झल्काउने बताए।
नेपाली सेनाले यस सहयोगलाई स्वागत गर्दै यसले द्विपक्षीय सम्बन्धमा थप ऊर्जा भर्ने टिप्पणी गरेको छ। सेनाले सहयोगका रूपमा प्राप्त जनावर र उपकरण जंगी अड्डामै राखिने जनाएको छ।
यो सामग्री हस्तान्तरण भारतले यसअघि दिने भनिए पनि समयमै सम्पन्न हुन नसकेको उपहारसमेत समेटेर सम्पन्न गरिएको हो। नेपालस्थित भारतीय दूतावासले सामाजिक सञ्जालमार्फत यस घटनालाई “नेपाल–भारत मैत्री” र “रक्षा सहकार्य” को प्रतीकका रूपमा प्रस्तुत गरेको छ।
मिस्री दुईदिने नेपाल भ्रमणमा आइतबार काठमाडौं आएका थिए। सो क्रममा उनले राष्ट्रपति रामचन्द्र पौडेल, प्रधानमन्त्री केपी शर्मा ओलीलाई भारतीय समकक्षी नरेन्द्र मोदीको निम्तो हस्तान्तरण, परराष्ट्रमन्त्री डा. आरजु राणा देउवा, नेपाली कांग्रेस सभापति शेरबहादुर देउवा र माओवादी केन्द्रका अध्यक्ष पुष्पकमल दाहालसँग भेटवार्ता गरेका थिए। सोमबार दिनभरका राजनीतिक भेटवार्तापछि उनले पशुपतिनाथ मन्दिरको दर्शनसमेत गरेका थिए।
यस किसिमका सहयोग र भेटवार्ताले नेपाल–भारत सम्बन्धको रक्षा, धार्मिक र राजनीतिक आयामलाई एकैसाथ छूएको देखिन्छ। दुवै देशबीचको विश्वासमाथि आधारित सहकार्यलाई आगामी वर्षहरूमा कसरी संस्थागत गर्ने भन्ने प्रश्न अझ महत्वपूर्ण बन्दै गएको छ।
