भारतका विदेश सचिव विक्रम मिस्रीले नेपालमा दुईदिने औपचारिक भ्रमण सम्पन्न गरेका छन् । नेपालका परराष्ट्र सचिव अमृत बहादुर राईको निमन्त्रणामा भदौ १ र २ गते भएको यस भ्रमणका क्रममा उनले राष्ट्रपति रामचन्द्र पौडेल, प्रधानमन्त्री केपी शर्मा ओली र परराष्ट्रमन्त्री डा. आरजु राणा देउवासहित उच्चस्तरीय राजनीतिक नेतृत्वसँग शिष्टाचार भेट गरेका छन् ।

भ्रमणका क्रममा मिस्रीले प्रधानमन्त्री ओलीलाई भारतका प्रधानमन्त्री नरेन्द्र मोदीको औपचारिक निमन्त्रणापत्र हस्तान्तरण गरेका छन्, जसअनुसार ओलीले दुवै देशलाई अनुकूल हुने मितिमा भारत भ्रमण गर्ने तय भएको छ । साथै, दुई देशका परराष्ट्र सचिवबीच विभिन्न द्विपक्षीय एजेन्डामा विस्तृत छलफल भएको र हालसम्मका प्रगतिहरुको समीक्षा गरिएको परराष्ट्र मन्त्रालयले जनाएको छ । छलफलमा भौतिक र डिजिटल पूर्वाधार, ऊर्जा सहकार्य, रक्षा र सुरक्षासहितका विषयमा हालैका उपलब्धिहरु प्रति दुवै पक्षले सन्तुष्टि व्यक्त गरेका छन् ।

विदेश सचिव मिस्रीले नेपाली सेनाका प्रधान सेनापति महारथी अशोक राज सिग्देलसँग भेट गरी लाइट स्ट्राइक भेहिकल (एलएसभी), क्रिटिकल केयर मेडिकल उपकरण तथा सैन्य जनावरलगायतका रक्षा सामग्री हस्तान्तरण गरेका छन् । यस कदमलाई दुई देशबीचको रक्षा सहकार्यलाई अझ मजबुत बनाउने संकेतका रूपमा लिइएको छ ।

सचिव मिस्रीले नेपालका अन्य वरिष्ठ राजनीतिक नेताहरुसँग समेत भेटवार्ता गरेका थिए । भारतीय विदेश मन्त्रालयका अनुसार ‘छिमेकी पहिलो नीति’ अन्तर्गत नेपाल भारतको प्राथमिक साझेदार हो र यस भ्रमणले उच्चस्तरीय आदानप्रदानको परम्परालाई निरन्तरता दिने मात्र नभई द्विपक्षीय सम्बन्धलाई अझ सुदृढ बनाउने काम गरेको छ ।

यस भ्रमणलाई विश्लेषकहरूले भारत–नेपाल सम्बन्धमा नियमित संवादलाई सुनिश्चित गर्ने एउटा सकारात्मक अभ्यासका रूपमा मूल्यांकन गरेका छन्, जसले आगामी उच्चस्तरीय भेटघाट र सहकार्यलाई सहज बनाउने अपेक्षा गरिएको छ ।

विक्रम मिस्री