नेकपा (एमाले) को दोस्रो विधान महाधिवेशन सुरु हुन १७ दिन बाँकी छ भने तयारी केन्द्रदेखि प्रदेश र जिल्ला कमिटीसम्म तीब्रगतिमा अघि बढेको पार्टी नेताहरूको भनाइ छ। पार्टीका अनुसार महाधिवेशन सुव्यवस्थित र भव्य बनाउन केन्द्रीय कार्यालयले आवश्यक पूर्वाधार र समन्वयमा काम गरिरहेको छ; प्रदेश–जिल्लास्तरमा महाधिवेशनसम्बन्धी तयारी बैठक, विधान संशोधनमाथि छलफल र सुझाव सङ्कलन जारी छन्।

महाधिवेशन ललितपुरको गोदावरीस्थित सनराइज हलमा भदौ २०–२२ मा आयोजना हुनेछ। तयारीको हिस्सास्वरूप आज उपमहासचिव तथा प्रधानमन्त्रीका मुख्य सल्लाहकार विष्णु रिमालको नेतृत्वमा स्थायी कमिटी सदस्य कृष्णगोपाल श्रेष्ठ, भानुभक्त ढकाल, राजेन्द्र गौतम, पोलिटब्यूरो सदस्य विनोद श्रेष्ठ र सुशीला नेपाल, केन्द्रीय सदस्य निरज आचार्य र रुपनारायण श्रेष्ठ, केन्द्रीय कार्यालय सचिव डा. भीष्म अधिकारी, सम्पर्क समन्वय कमिटी संयोजक श्याम बस्नेत, बाग्मती प्रदेश कमिटी सचिव नवराज सिलवाल, ललितपुर जिल्ला कमिटी अध्यक्ष पुरुषोत्तम आचार्य र भक्तपुर जिल्ला कमिटी अध्यक्ष बचन देउजासहितको टोलीले सनराइज हलको अवलोकन गरेको छ।

टोलीले मुख्य सभाहल, बैठक कक्ष, सचिवालय सञ्चालन कक्ष, फर्निचर, सञ्चार सुविधा, मिडिया सेन्टर, मेडिकल टिम, खानेपानी र गाडी पार्किङको व्यवस्थाबारे अध्ययन–विमर्श गर्छै व्यवस्थापन चुस्त बनाउन निर्देशित गरेको बताइएको छ। पार्टी प्रचार विभाग प्रमुख राजेन्द्र गौतमका अनुसार महाधिवेशनमा दुई हजार १२८ जना प्रतिनिधिसँगै २६४ जना आयोजक गरी कुल दुई हजार ३९२ जनाको सहभागिता रहनेछ। तयारीले लिएको गति र स्थलको व्यवस्थापन समीक्षा भइरहेकाले आगामी दिनमा एजेन्डा तथा कार्यविधिका थप विवरण क्रमशः सार्वजनिक हुने अपेक्षा गरिएको छ।