भाद्र कृष्ण औँसी अर्थात् कुशे औँसीका अवसरमा प्रधानमन्त्री केपी शर्मा ओलीले सबै नेपालीलाई शुभकामना व्यक्त गर्नुभएको छ। शनिबार बिहान सामाजिक सञ्जालमार्फत उहाँले जीवित पिताहरूप्रति नमन र दिवङ्गत पितृहरूप्रति श्रद्धा अर्पण गर्दै बुबाको मुख हेर्ने दिनलाई परिवार र परम्पराको महत्त्वपूर्ण प्रतीकका रूपमा व्याख्या गर्नुभयो।

प्रधानमन्त्री ओलीले बिहानै आफ्ना ९६ वर्षीय बुबासँग आशीर्वाद लिएको अनुभव पनि साझा गर्नुभएको छ। उहाँले लेख्नुभएको छ, “बुबा ९६ वर्षको हुनुभयो। कान अलि कम सुन्नुहुन्छ तर पुस्तक पढ्न अझै चस्मा चाहिँदैन। नजिकसम्मका हिँडडुल गर्न सक्नुहुन्छ।” ओलीले बुबासँग केही पुराना प्रसङ्ग सम्झँदै छोटो संवाद गरेको र उहाँको सुस्वास्थ्य तथा दीर्घायुको कामना गरेको उल्लेख गर्नुभएको छ।

उहाँले आफ्नो बाल्यकाल स्मरण गर्दै चार वर्षको उमेरमै आमा बित्नुभएको र आमाको अनुहारको धमिलो सम्झना मात्र बाँकी रहेको पनि उल्लेख गर्नुभयो। ओलीका अनुसार बुबाको मुख हेर्ने दिन केवल संस्कारिक कर्मकाण्ड नभई पितृप्रति सम्मान र आभार प्रकट गर्ने अवसर हो। उहाँले भन्नुभयो, “बुबाआमालाई एउटा विशेष दिनमा मात्र होइन, सधैं आदर सम्मान गर्नुपर्छ। तर टाढा रहेका छोराछोरी पनि यस दिन बुबाको मुख हेर्न आउने भएकाले यसलाई विशेष दिन मानिन्छ।”

नेपाली समाजमा भाद्र कृष्ण औँसी विशेषतः बाबुलाई समर्पित दिनका रूपमा मनाइन्छ। यस दिन छोराछोरीले आफ्ना बाबुलाई मन पर्ने भोजन खुवाएर आदर प्रकट गर्ने र बुबाको मुख हेर्ने परम्परा रहिआएको छ।

प्रधानमन्त्री ओलीको सन्देशले व्यक्तिगत स्मृतिदेखि सामाजिक परम्परासम्मको निरन्तरतालाई जोड्दै वर्तमान पुस्ताले पनि आस्थापूर्वक परिवार र संस्कृतिलाई सम्मान गर्नुपर्ने सन्देश दिएको देखिन्छ।