प्रधानमन्त्री एवम् नेकपा (एमाले)का अध्यक्ष केपी शर्मा ओली आगामी भदौ १४ देखि १८ गतेसम्म (सन् २०२५ अगष्ट ३० देखि सेप्टेम्बर ३) जनवादी गणतन्त्र चीनको पाँचदिने औपचारिक भ्रमणमा प्रस्थान गर्ने भएका छन्। शुक्रबार प्रतिनिधिसभाको बैठकलाई सम्बोधन गर्दै प्रधानमन्त्री ओलीले भ्रमणको मुख्य उद्देश्य चीनको थियानजिन शहरमा हुने साङ्घाई सहयोग सङ्गठन (एससिओ) को शिखर सम्मेलनमा भाग लिनु रहेको स्पष्ट गरे।

सन् २००१ मा स्थापना भएको एससिओ हाल विश्वकै ठूला क्षेत्रीय संगठनमध्ये एक मानिन्छ। यसका सदस्य मुलुकहरूमा चीन, रूस, भारत, पाकिस्तान, काजाकिस्तान, किर्गिस्तान, ताजिकिस्तान, उज्बेकिस्तान, इरान र बेलारुस छन्। नेपाल सन् २०१६ देखि संवाद साझेदार राष्ट्रको रूपमा सक्रिय रहँदै आएको छ।

प्रधानमन्त्री ओलीले भ्रमणका क्रममा चीनका राष्ट्रपति सी चिनफिङ र उपराष्ट्रपति हान चङ्गसँग छुट्टाछुट्टै भेटवार्ता गर्ने तयारी भएको जानकारी दिए। त्यस्तै, एससिओ शिखर सम्मेलनका अवसरमा अन्य मुलुकका राष्ट्र तथा सरकार प्रमुखहरूसँग द्विपक्षीय भेटवार्ता हुने कार्यक्रमसमेत छ। हालसम्म तय भएको सूचीअनुसार उहाँले रूसका राष्ट्रपति भ्लादिमिर पुटिन, माल्दिभ्सका राष्ट्रपति डा. मोहमद मिज्जु, कम्बोडियाका प्रधानमन्त्री डा. सोमदेक मोहा बोरभोर तिपाहदे हुन महानेट, लाओसका प्रधानमन्त्री सोनेसाइ सिपानडोन र भियतनामका प्रधानमन्त्री फाम मिन चिङसँग भेट गर्नेछन्।

यससँगै नेपाली प्रतिनिधिमण्डलले बेइजिङमा आयोजना हुने फासिवादविरुद्धको विश्वयुद्ध र जापानी अतिक्रमणविरुद्धको चिनियाँ प्रतिरोधी युद्धको ८०औँ विजय दिवस समारोहमा समेत सहभागी हुने कार्यक्रम रहेको छ। चिनियाँ पक्षका अनुसार उक्त समारोहमा ५० भन्दा बढी मुलुकका प्रतिनिधिमण्डल सहभागी हुनेछन्।

भ्रमणले नेपाल–चीन सम्बन्धलाई थप सुदृढ बनाउन मद्दत गर्ने अपेक्षा गरिएको छ। संसदमा सम्बोधन गर्दै प्रधानमन्त्री ओलीले यसलाई नेपालको अन्तर्राष्ट्रिय छवि र प्रतिष्ठा बलियो बनाउन महत्वपूर्ण अवसरका रूपमा प्रस्तुत गरे।

उच्चस्तरीय भ्रमण दलमा प्रधानमन्त्रीकी धर्मपत्नी राधिका शाक्य, पूर्व उपप्रधानमन्त्री पूर्णबहादुर खड्का, शिक्षा, विज्ञान तथा प्रविधि मन्त्री रघुजी पन्त, संस्कृति, पर्यटन तथा नागरिक उड्डयन मन्त्री बद्रीप्रसाद पाण्डे, पूर्वमन्त्री एवं प्रधानमन्त्रीका आर्थिक तथा विकास सल्लाहकार डा. युवराज खतिवडा, पूर्वमन्त्री तथा सांसद छविलाल विश्वकर्मालगायत वरिष्ठ सरकारी अधिकारीहरूको सहभागिता रहनेछ।

नेपालले सन् २०१६ यता एससिओमा संवाद साझेदारको रूपमा आफ्नो उपस्थिति बढाउँदै आएको छ। यसपटकको भ्रमणले केवल द्विपक्षीय सम्बन्ध मात्र होइन, नेपाललाई क्षेत्रीय सुरक्षा र आर्थिक सहयोगको बहसमा समेत सक्रिय रूपमा प्रस्तुत गर्ने अपेक्षा गरिएको छ।