प्रधानमन्त्री केपी शर्मा ओली चिनियाँ राष्ट्रपति सि चिनफिङको औपचारिक निमन्त्रणामा शनिबार चीनको तियान्जिन पुग्दै हुनुहुन्छ । उहाँ नेतृत्वको प्रतिनिधिमण्डलले साङ्घाई सहयोग सङ्गठन (एससीओ) को २५ औँ शिखर सम्मेलनमा भाग लिने कार्यक्रम रहेको छ । सम्मेलन भदौ १४ देखि १५ गतेसम्म तियान्जिनमा हुँदैछ, जसको उद्घाटन राष्ट्रपति सि स्वयंले गर्नेछन् ।

परराष्ट्र मन्त्रालयका अनुसार प्रतिनिधिमण्डलमा प्रथम महिला राधिका शाक्य, शिक्षा, विज्ञान तथा प्रविधि मन्त्री रघुजी पन्त, संस्कृति, पर्यटन तथा नागरिक उड्डयन मन्त्री बद्रीप्रसाद पाण्डे, प्रधानमन्त्रीका आर्थिक सल्लाहकार डा. युवराज खतिवडा, नेपाली कांग्रेसका उपसभापति पूर्णबहादुर खडका, नेकपा एमालेका सचिव छविलाल विश्वकर्मा तथा मन्त्रालयका अधिकारीहरु सहभागी हुनेछन् ।

चीनका उपपरराष्ट्रमन्त्री लु विनले प्रस्ट पारेअनुसार शिखर सम्मेलनमा एससीओका दश सदस्य राष्ट्रसहित करिब २० देशका राष्ट्र वा सरकार प्रमुखको उपस्थिति रहनेछ । भारतका प्रधानमन्त्री नरेन्द्र मोदी, रुसका राष्ट्रपति भ्लादिमिर पुटिन, इरानका राष्ट्रपति मसुद पेजेस्कियान, पाकिस्तानका प्रधानमन्त्री सहबाज सरिफ, टर्कीका राष्ट्रपति रेसिप तैयिप एर्दोगान, बेलारुसका राष्ट्रपति अलेक्ज्यान्डर लुकासेन्को र अन्य शीर्ष नेताहरूलाई पनि निमन्त्रणा गरिएको छ । साथै, संयुक्त राष्ट्र महासचिव एन्टोनियो गुटेरेसले समेत भाग लिने निश्चित भएको छ ।

नेपाल सन् २०१६ मा एससीओमा संवाद साझेदारको रुपमा आवद्ध भएको हो । सन् २००१ मा चीन, रूस, काजाकिस्तान, कीर्गिस्तान, ताजिकिस्तान र उज्बेकिस्तानले स्थापना गरेको यो संगठन अहिले भारत, पाकिस्तान, इरान र बेलारुससहित विस्तारित भइसकेको छ । यसलाई युरेशियन क्षेत्रको राजनीतिक, आर्थिक तथा सुरक्षा निकायको रुपमा हेरिन्छ ।

तियान्जिनमा प्रधानमन्त्री ओली र राष्ट्रपति सि बीच द्विपक्षीय भेटवार्ता शनिबारमै हुने कार्यक्रम छ । ओलीले भदौ १६ गते सम्मेलनमा अतिथि वक्ताको रुपमा सम्बोधन गर्ने तय भएको छ ।

यसपछि भदौ १८ गते प्रधानमन्त्री ओली बेइजिङस्थित तियानमिन स्क्वायरमा आयोजित जापानी उपनिवेशविरुद्ध चीनको विजय र विश्व फासिस्ट विरोधी दिवसको ८० औँ वार्षिकोत्सवमा सहभागी हुनेछन् । सो समारोहमा २६ देशका राष्ट्रप्रमुख तथा सरकार प्रमुख सहभागी हुने तयारी छ, जसमा पुटिन, उत्तर कोरियाका नेता किम जोङ उन, कम्बोडियाका राजा सिहामोनी, भियतनाम र इण्डोनेसियाका राष्ट्रपति लगायत रहेका छन् ।

चीन भ्रमणका क्रममा ओलीले विभिन्न राष्ट्रका प्रमुखहरूसँग द्विपक्षीय भेटवार्ता गर्ने अपेक्षा गरिएको छ । नेपालका लागि यो भ्रमण क्षेत्रीय सहयोग र कूटनीतिक सन्तुलन मजबुत पार्ने अवसरका रुपमा हेरिएको छ ।