परराष्ट्रमन्त्री डा. आरजु राणा देउवाले सुदूरपश्चिम प्रदेशमा उपलब्ध सम्भावनाहरुमा वैदेशिक लगानी आकर्षित गर्न सकिने बताउँदै लगानीकर्ताहरुलाई सक्रिय हुन आह्वान गर्नुभएको छ। शुक्रबार परराष्ट्र मन्त्रालयमा सुदूरपश्चिम प्रदेश सरकारले आगामी नोभेम्बर १७–१८ मा धनगढीमा आयोजना गर्न लागेको ‘सुदूरपश्चिम लगानी तथा विकास सम्मेलन’को तयारी सम्बन्धी बैठकमा उहाँले यस्तो आग्रह गर्नुभएको हो।

बैठकमा नेपालस्थित विभिन्न मुलुकका राजदूत तथा कूटनीतिक प्रतिनिधिहरुको उपस्थिति थियो। त्यही अवसरमा मन्त्री राणाले सुदूरपश्चिमलाई “नेपालकै समृद्धिको प्रवेशद्वार”का रूपमा परिभाषित गर्दै यहाँ जलविद्युत् र नवीकरणीय ऊर्जा, कृषि, पर्यटन, सिमापार व्यापार, शहरी पूर्वाधार, सूचना प्रविधि, खानी र प्राकृतिक स्रोतमा आधारित उद्योगका प्रशस्त अवसर रहेको स्पष्ट पार्नुभयो।

उहाँका अनुसार सुदूरपश्चिम जलस्रोत, उर्वरभूमि, नदी, घना वनजंगल, जैविक विविधता र सांस्कृतिक सम्पदाले सम्पन्न भए पनि “बत्तिमुनिको अँध्यारो” जस्तै उपेक्षित बनेको छ। यसकारण सम्मेलनमार्फत अन्तर्राष्ट्रिय समुदायसमक्ष यी सम्भावनाहरु उजागर गर्न सकिनु सकारात्मक पहल भएको उहाँको भनाइ थियो।

मन्त्री राणाले तीन दशकअघिसम्म सुदूरपश्चिमको अवस्था अत्यन्तै पछाडि परेको स्मरण गर्दै शेरबहादुर देउवा प्रधानमन्त्री भएपछि पुल र सडक निर्माणमार्फत क्षेत्र देशको अन्य भागसँग प्रत्यक्ष जोडिएको उदाहरण दिनुभयो। वर्तमान सरकारलाई उहाँले “दिगो र स्थायी प्रकृतिको” भन्दै लगानीमैत्री कानुनी सुधार अघि बढाइरहेको जानकारीसमेत दिनुभयो।

संघीय संरचनापछि प्रदेश सरकारले केन्द्रको मुख मात्र ताक्ने होइन, आफ्ना सम्भावनाहरु पहिचान गरी स्वयम् विकास मोडल अघि बढाउनुपर्नेमा पनि उहाँले जोड दिनुभयो।

सुदूरपश्चिम प्रदेश सरकारले आयोजना गर्न लागेको सम्मेलनले भौगोलिक रूपमा पच्छाडि देखाइने तर स्रोत र साधनले सम्पन्न यो क्षेत्रमा लगानीको नयाँ ढोका खोल्ने अपेक्षा गरिएको छ।