भारत क्रस बोर्डर मिडिया कन्क्लेभ २०२५ को मञ्च आज असामान्य रुपमा तात्यो, जब डेनमार्कका लागि नेपालका पूर्वराजदूत विजय कान्त कर्णले प्रधानमन्त्री केपी शर्मा ओलीविरुद्ध घुमाउरो तर तीखो प्रहार गरे। चीन भ्रमणमा रहेका ओलीकै नेतृत्वमा संविधानमा विवादास्पद चुच्चे नक्सा समावेश गरिएको प्रसंग उठाउँदै कर्णले यसलाई “राजनीतिक गल्ती” को संज्ञा दिए।

उनले भने, “नेपालले चुच्चे नक्सा संविधानमा राखेर गल्ती गरेको हो,” भन्दै अहिले नेपाल अन्तर्राष्ट्रिय स्तरमा थप दबाबको सामना गर्नुपरेको व्याख्या गरे। कर्णको यो भनाइ त्यही समय आएको हो, जब प्रधानमन्त्री ओली चीनको पाँचदिने भ्रमणमा छन्। यसले उनको टिप्पणीलाई अझै अर्थपूर्ण र राजनीतिक रुपमा संवेदनशील बनाएको छ।

कार्यक्रममा सहभागी पत्रकार र सरोकारवालाबीच तत्कालै बहस सुरु भयो। कतिपयले कर्णको भनाइलाई साँचो औंल्याउँदै संविधान संशोधन प्रक्रियाको कमजोर तयारीको परिणाम भने, कतिले यसलाई नेपालको सार्वभौम हितविरुद्धको अभिव्यक्ति भन्दै आलोचना गरे। उपस्थित सञ्चारकर्मीहरूले ‘यो कन्क्लेभले सीमासम्बन्धी घाउलाई फेरि उकास्यो’ भन्ने टिप्पणीसमेत गरे।

तर कर्णले आफूको तर्कलाई स्पष्ट पार्दै भने, “दुई देशको उन्नति र प्रगतिमा मिडियाको भूमिका महत्त्वपूर्ण हुन्छ। तर यस्ता नीतिगत गल्तीहरूले सन्धि–सम्झौतामा उल्झन ल्याउँछन्।” उनको भनाइले नेपाल–भारत सम्बन्धमा मिडियाले खेलेको पुलको भूमिकालाई जोड दिए पनि ओलीको निर्णयप्रति असहमति प्रष्टै देखियो।

प्रधानमन्त्री ओली चीन भ्रमणमै रहेकाले कर्णको वक्तव्यबारे तत्काल प्रतिक्रिया आएको छैन। तर उनको पुरानो शैली हेर्दा, यस प्रकारको टिप्पणीलाई ओली हल्का रुपमा नलिने अनुमान सार्वजनिक वृत्तमा गरिँदै छ।

वीरगञ्जको उक्त कन्क्लेभ मूलत: नेपाल–भारतबीच सञ्चार सहकार्य सुदृढ बनाउने उद्देश्यले आयोजना गरिएको हो। तर पूर्वराजदूतको भनाइले यसलाई सिधै संवैधानिक विवाद र राष्ट्रिय राजनीति जोडिदिँदा, यो कार्यक्रम सीमाभन्दा धेरै पर चर्चित हुने निश्चित देखिन्छ।