एथलेटिक्स परिवार, नेपालको चौथो वार्षिक साधारण सभा आइतबार राजधानी काठमाडौंमा सम्पन्न भएको छ।

कीर्तिमानी धावक बैकुण्ठ मानन्धरको प्रमुख आतिथ्यता तथा संस्थाका सल्लाहकार मोहन नेपालको सभापतित्वमा भएको कार्यक्रममा अध्यक्ष राजन खत्रीले आगामी आर्थिक वर्ष २०८२/८३ का लागि वार्षिक कार्यक्रम तथा बजेट प्रस्तुत गर्नुभयो।

सभामा एथलेटिक्समा लामो दूरीका चर्चित धावकद्वय त्रिभुवन आर्मी क्लबका खड्कबहादुर खड्का र पूर्णलक्ष्मी न्यौपानेका साथै प्रशिक्षकद्वय सीताराम चौधरी र देवीबहादुर बस्नेतलाई समेत सम्मान गरिएको थियो।

यसअघि एथलेटिक्स परिवार नेपालले आर्थिक वर्ष २०८१/८२ मा नेपालभर सञ्चालित विभिन्न १४ वटा राष्ट्रिय खेलकुद प्रतियोगितामा प्राविधिक सहयोगीका रूपमा भूमिका निर्वाह गरेको जानकारी दिइएको छ। सभामा एथलेटिक्स खेलको विकास र विस्तारमा अझ प्रतिबद्ध भएर अघि बढ्ने प्रतिवद्धता समेत व्यक्त गरिएको थियो।