नेपाली राष्ट्रिय क्रिकेट टोलीका चर्चित अलराउन्डर सोमपाल कामीलाई 'रोट्रयाक वर्ष खेलाडी' पुरस्कारबाट सम्मान गरिएको छ। रोट्रयाक क्लब अफ तिनाउ सिटी, बुटवलले आफ्नो दशौँ पदस्थापन समारोहको अवसर पारेर शनिबार साँझ उनलाई एक लाख रुपैयाँ नगदसहित सम्मानपत्र प्रदान गरेको हो।

सम्मान ग्रहण गरेपछि क्रिकेट खेलाडी सोमपालले यस किसिमका सम्मानहरूले खेलाडीलाई थप ऊर्जा र जोश प्रदान गरी अझ उत्कृष्ट प्रदर्शन गर्न प्रेरित गर्ने प्रतिक्रिया दिए। उनले क्रिकेट खेलको विकास र प्रवर्द्धनमा यस प्रकारका सम्मानको ठूलो महत्त्व रहेको समेत उल्लेख गरे।

रोट्रयाक क्लब अफ तिनाउ सिटीले यसअघि पनि नेपाली क्रिकेटका चर्चित नामहरू पूर्व कप्तान शक्ति गौचन, राष्ट्रिय टोलीका सदस्यहरू कुशल मल्ल, सुशान्त भारी, कुशल भुर्तेल र करन केसीलाई समेत सम्मान गरिसकेको छ।

कार्यक्रममा क्लबका अध्यक्ष विमल ज्ञवालीले खेल क्षेत्रको विकास र खेलाडीहरूको मनोबल बढाउन हरेक वर्ष एक जना खेलाडीलाई सम्मान गर्दै आएको बताए। उनले यो सम्मान कार्यक्रमलाई भविष्यमा पनि निरन्तरता दिने प्रतिबद्धता व्यक्त गरे।