चालु आर्थिक वर्ष २०८२/८३ को बजेट कार्यान्वयन सन्दर्भमा अर्थ मन्त्रालयले स्वास्थ्य तथा जनसङ्ख्या मन्त्रालयसँग महत्वपूर्ण छलफल गरेको छ। उपप्रधानमन्त्री तथा अर्थमन्त्री विष्णुप्रसाद पौडेलको सचिवालयका अनुसार छलफलको मुख्य विषय संघीय अस्पतालहरूको विशिष्ट सेवा विस्तार र जनशक्ति अभाव समाधान गर्नेतर्फ केन्द्रित थियो।

स्वास्थ्य मन्त्री प्रदीप पौडेलले सातवटै प्रदेशमा सेवा प्रभावकारी बनाउनका लागि डाक्टर, नर्ससहित २,१०० जनशक्ति थप आवश्यक रहेको प्रस्ताव पेस गर्नुभयो। मन्त्री पौडेलले प्रदेशस्तरमा गुणस्तरीय स्वास्थ्य सेवा प्रवाहमा सुधार ल्याउन दक्ष जनशक्ति अनिवार्य भएको औँल्याउनुभयो।

अर्थमन्त्री पौडेलले सो प्रस्तावलाई गम्भीरतापूर्वक लिँदै, छिटो, प्रभावकारी र गुणस्तरीय स्वास्थ्य सेवा सुनिश्चित गर्न डाक्टर, नर्स लगायतको दक्ष जनशक्ति अपरिहार्य भएको बताउँदै जनशक्ति व्यवस्थापनबारे थप परामर्श गरी अघि बढ्ने प्रतिबद्धता व्यक्त गर्नुभयो।

छलफलमा स्वास्थ्य बीमा, सामाजिक सुरक्षा, बालबालिकालाई निःशुल्क औषधि उपलब्ध गराउने कार्यक्रम, भक्तपुरको दुवाकोटमा निर्माणाधीन वीर अस्पतालको डिटेल प्रोजेक्ट रिपोर्ट (DPR), जलन उपचार सेवा लगायतका विषयमा समेत गम्भीर बहस भएको थियो।

यो छलफलसँगै संघीय सरकारले स्वास्थ्य पूर्वाधार र जनशक्ति विस्तारलाई प्राथमिकतामा राख्ने संकेत देखिएको छ।