चीनको थियानजिनस्थित मेइजियान सम्मेलन केन्द्रमा सुरु भएको शाङ्घाइ सहयोग सङ्गठन (एससिओ) प्लस शिखर सम्मेलनमा नेपालका प्रधानमन्त्री केपी शर्मा ओलीले सम्बोधन गर्दै हुनुहुन्छ। आइतबारदेखि सुरु भएको यो सम्मेलनमा सहभागी राष्ट्र प्रमुख तथा सरकार प्रमुखहरूले आ–आफ्ना धारणा राख्ने कार्यक्रम तय गरिएको छ।

प्रधानमन्त्री ओली चीनका राष्ट्रपति सी चिनफिङको मैत्रीपूर्ण निमन्त्रणामा भदौ १४ गतेदेखि पाँच दिने भ्रमणमा चीन पुग्नुभएको हो। यस अवधिमा उहाँले सम्मेलनसँगै विभिन्न मुलुकका शीर्ष नेताहरूसँग दुईपक्षीय भेटवार्ता गर्ने तालिका पनि अघि बढिरहेको छ।

आजै ओलीले रुसी महासङ्घका राष्ट्रपति भ्लादिमीर पुटिन, माल्दिभ्सका राष्ट्रपति डा. मोहमद मिज्जु, र लाओ जनप्रजातान्त्रिक गणतन्त्रका प्रधानमन्त्री सोनेसाइ सिपानडोनसँग भेटवार्ता गर्ने कार्यक्रम रहेको प्रधानमन्त्रीको सचिवालयले जनाएको छ। यी भेटवार्तालाई नेपालले बहुपक्षीय सम्मेलनसँगै दुईपक्षीय सम्बन्ध मजबुत पार्ने अवसरको रूपमा लिएको छ।

एससिओ प्लस शिखर सम्मेलनलाई चीनले क्षेत्रीय सुरक्षा, आर्थिक सहकार्य र बहुध्रुवीय विश्वव्यवस्थाबारे छलफल गर्ने साझा मंचका रूपमा प्रस्तुत गरेको छ। नेपालको सहभागिता यसले आफ्ना छिमेकी मुलुकहरूसँगको सम्बन्धलाई मात्र होइन, व्यापक क्षेत्रीय सम्वादमा उपस्थितिलाई पनि बलियो बनाउने संकेत गर्दछ।

भेटवार्ता र सम्बोधनका क्रममा नेपालले आगामी दिनमा कसरी आफ्नो विदेश नीतिलाई सन्तुलित ढङ्गले अघि बढाउँछ भन्नेमा क्षेत्रीय शक्तिहरूको दृष्टि रहने सम्भावना छ।