नेकपा एमालेले जेनजी आन्दोलनपश्चात पहिलो पटक सचिवालय बैठक बस्ने भएको छ। पार्टी प्रचार तथा प्रकाशन विभाग प्रमुख राजेन्द्र गौतमका अनुसार बैठक आइतबार दिउँसो १ बजे अध्यक्ष केपी शर्मा ओलीको भक्तपुर, गुण्डुस्थित निवासमा आह्वान गरिएको हो।

गौतमले जानकारी दिएअनुसार बैठकमा जेनजी प्रदर्शनपछि देशभर उब्जिएको राजनीतिक परिस्थिति र त्यसले ल्याएको चुनौतीबारे विस्तृत छलफल हुनेछ। साथै बैठकले पार्टीको आगामी रणनीति र कार्यदिशा तय गर्ने अपेक्षा गरिएको छ।

राजनीतिक अस्थिरता र आन्दोलनपश्चात बनेको नयाँ समीकरणबीच एमालेको यो बैठक विशेष महत्वको रूपमा हेरिएको छ। यसबाट पार्टीको नीतिगत र राजनीतिक मार्गचित्र कस्तो आउने हो भन्नेप्रति सरोकारवालाको ध्यान केन्द्रित भएको छ।