युनिटी कप टी–२० सिरिज अन्तर्गत नेपाल र वेस्ट इन्डिजबीचको अन्तिम खेल आज राति शारजाह क्रिकेट स्टेडियममा हुने भएको छ। खेल नेपाली समय अनुसार राति सवा ८ बजे सुरु हुनेछ।

नेपालले सिरिजको उपाधि पहिले नै सुनिश्चित गरिसकेको छ। पहिलो खेलमा १९ रनले र दोस्रो खेलमा ९० रनको विशाल अन्तरले जित हात पार्दै नेपालले लगातार दुई जितपछि उपाधि जितेको हो। यसले नेपाललाई सिरिजमा ‘क्लिन स्वीप’ गर्ने अवसर दिएको छ।

यो सिरिज नेपालका लागि ऐतिहासिक पनि मानिएको छ, किनकि टी–२० विश्वकप छनोटको तयारीमा रहेको नेपाली टोली पहिलोपटक दुईपटकको विश्वकप विजेता वेस्ट इन्डिजजस्तो टेस्ट राष्ट्रसँग श्रृंखला खेलेको हो।

आजको अन्तिम खेल केवल औपचारिकता नभई नेपालको तयारी र आत्मविश्वासलाई थप निखार्ने मौका पनि बन्ने देखिन्छ, जसले विश्वकप लक्षित यात्रामा टोलीलाई थप बलियो बनाउन सक्छ।