ओली प्रधानमन्त्री नियुक्त, बालेनलाई अदालतबाट अनुमति: नयाँ सडकको फुटपाथ निर्माण हुने
![ओली प्रधानमन्त्री नियुक्त, बालेनलाई अदालतबाट अनुमति: नयाँ सडकको फुटपाथ निर्माण हुने](https://nepalaaja-files-storage.sfo2.cdn.digitaloceanspaces.com/uploads/EditorialDesk_84/2024/07/fufwzd1auayxlbn.jpg)
काठमाडौं । नेकपा एमालेका अध्यक्ष खड्गप्रसाद (केपी) ओली चौथो पटक नेपालका प्रधानमन्त्री नियुक्त भएका छन्। यो ऐतिहासिक घटना आइतवार साँझ भएको हो। त्यही दिन, काठमाडौँ महानगरपालिकाका मेयर बालेन शाहलाई उच्च अदालत पाटनबाट नयाँ सडकमा फुटपाथ (सडक पेटी) विस्तारको काम निरन्तर गर्न पाउने अन्तरिम आदेश प्राप्त भएको छ। यस परियोजना डिभिजन सडक कार्यालय, काठमाडौँको अवरोधका कारण रोकिएको थियो।
महानगरपालिकाले पैदल मार्ग सुधारका लागि थालेको यो काम डिभिजन सडक कार्यालयको हस्तक्षेपका कारण रोकिनु परेको थियो। पैदलयामैत्री बनाउन महानगरपालिकाले निर्माण पक्ष छनोट गरेर जेठ ११ गतेदेखि काम थालेको थियो, तर डिभिजन सडक कार्यालयले भौतिक हस्तक्षेप गर्दै यो काम रोक्न दुई वटा पत्र पठाएको थियो।
महानगरपालिकाले उच्च अदालत पाटनमा रिट दायर गरेपछि, न्यायाधीशद्वय ध्रुवराज नन्द र प्रकाश खरेलको संयुक्त इजलासले महानगरपालिकाको मागबमोजिम अन्तरिम आदेश जारी गर्यो। अदालतको आदेशमा संविधान, कानुनका प्रावधान, सडक नीति र मापदण्डलाई दृष्टिगत गर्दै महानगरपालिकाले सुरु गरेको फुटपाथ विस्तार योजना सञ्चालन गर्न रोक लगाउने डिभिजन सडक कार्यालयको पत्रहरु कार्यान्वयन नगर्न आदेश दिइएको छ।
महानगरपालिकाका कानुनी सल्लाहकार ओमप्रकाश अर्यालले आदेशको प्रतिक्रियामा भने, "महानगरपालिकाले गरेको काम सही र डिभिजन सडक कार्यालयले गरेको पत्राचार तथा कार्य अवैध थियो भन्ने प्रमाणित भएको छ। अब महानगरपालिकाले सुरु गरेको फुटपाथ निर्माणको कामलाई निरन्तरता दिन बाटो खुला भएको छ।"