धुलिखेल नगरपालिकास्थित धुलिखेल अस्पतालमा आज एक महत्वपूर्ण घटनाको उद्घाटन भयो। ‘नेपाल–भारत विकास सहकार्य’ अन्तर्गत भारत सरकारको ४.२६ करोड रुपैयाँ आर्थिक सहयोगमा निर्माण गरिएको वार्ड भवनको उद्घाटन भारतीय राजदूतावास, काठमाडौंका प्रथम सचिव श्री अविनाश कुमार सिंहले गर्नुभएको छ।

उक्त कार्यक्रममा धुलिखेल नगरपालिकाका मेयर, राजनीतिक प्रतिनिधि, सरकारी अधिकारी, अस्पताल व्यवस्थापनका प्रतिनिधि तथा समाजसेवीहरुको व्यापक उपस्थिति रहेको थियो।

भारतीय सहयोगमा निर्माण भएको यो वार्ड भवनले नेपाली जनतालाई स्वास्थ्य सेवामा गुणस्तरिय पूर्वाधार र राम्रो वातावरण उपलब्ध गराउनेछ। भारत सरकार र नेपाल सरकारबीच भएको सम्झौताअन्तर्गत यो परियोजनालाई उच्च प्रभाव सामुदायिक विकास परियोजनाको रुपमा अघि बढाइएको हो।

धुलिखेल नगरपालिकाका मेयर र अन्य वक्ताहरुले कार्यक्रममा बोल्दै नेपालका जनताको उत्थानका लागि भारत सरकारले पुर्याउँदै आएको निरन्तर विकास सहयोगको प्रशंसा गरेका छन्।

सन् २००३ यता भारत सरकारले नेपालका विभिन्न क्षेत्रमा ५५१ वटा भन्दा बढी उच्च प्रभाव सामुदायिक विकास परियोजना अघि बढाएको छ र ४९० वटा परियोजना सम्पन्न गरिसकेको छ। यसै क्रममा काभ्रेपलाञ्चोक जिल्लाका ७ वटा परियोजनासहित बागमती प्रदेशको विभिन्न क्षेत्रमा १०६ वटा परियोजनाहरु रहेका छन्।

भारत सरकारले नेपालका विभिन्न अस्पताल, स्वास्थ्य चौकी र शैक्षिक संस्थालाई १००९ वटा एम्बुलेन्स र ३०० वटा स्कुल बस उपहारस्वरुप प्रदान गरिसकेको छ। धुलिखेल अस्पताललाई २०२१ जनवरीमा एक एड्भान्स लाइफ सपोर्ट एम्बुलेन्स उपहारस्वरुप प्रदान गरिएको थियो, जसले स्वास्थोपचारमा महत्वपूर्ण योगदान पुर्याउँदै आएको छ।

भारत र नेपालबीचको यो सहकार्यले दुई देशबीचको मित्रता र विकास साझेदारीलाई अझ सुदृढ बनाएको छ। उच्च प्रभाव सामुदायिक विकास परियोजनाको कार्यान्वयनले नेपाली जनताको समुन्नतिका लागि भारत सरकार सदैव हातेमालो गर्न तयार रहेको कुरालाई प्रतिबिम्बित गरेको छ।

भारतीय राजदूतावास