पूर्वप्रधानमन्त्री तथा एकीकृत समाजवादीका सम्मानित नेता झलनाथ खनालले वर्तमान सरकारलाई "संकटको पोका" बोकेर हिँडिरहेको आरोप लगाएका छन्। उनका अनुसार, सरकारसँग दुई-तिहाइको बहुमत भए पनि यसको निर्णयहरू निरन्तर विवादित बन्दै गएका छन्।

नेपाल प्रेस संगठनले धनुषामा आयोजना गरेको पत्रकार सम्मेलनमा बोल्दै खनालले सरकारले ल्याएको पछिल्लो अध्यादेशलाई "संकटकै अर्को रुप" भनेर व्याख्या गरे। "नियमित प्रक्रियाबाटै कानुन बनाउन सकिने अवस्था हुँदाहुँदै अध्यादेश किन ल्याइयो?" उनले प्रश्न गरे।

सरकारको कदम अस्वाभाविक! समर्थन गर्न नसकिने
खनालले संवैधानिक व्यवस्थाअनुसार सामान्य रूपमा कानून बनाउने प्रक्रियामा कुनै आपत्ति नरहेको बताए। तर, सरकारले अध्यादेश ल्याउनुको कुनै औचित्य पुष्टि गर्न नसकेको उनको धारणा छ। "विशेष परिस्थितिमा मात्र अध्यादेश ल्याइन्छ, अहिले त्यस्तो कुनै संकट छैन," खनालले भने। "सरकारले अध्यादेशको औचित्य स्पष्ट पार्न सकेन, त्यसैले हाम्रो पार्टीले समर्थन गर्न सक्दैन।"

सरकारले 'मान्छे बेच्न' मेनपावर खोलेको आरोप!
खनालले सरकारकै कमजोरीका कारण मुलुकमा युवा पलायन तीव्र भएको दाबी गरे। "सरकारले नै ठाउँ-ठाउँमा मेनपावर खोलेर मान्छे बेच्ने काम गरिरहेको छ," उनले कटाक्ष गरे।

उनको अनुसार, सरकारको गलत नीतिले देशका युवाहरू रोजगारी खोज्दै विदेशिन बाध्य छन्, जसले नेपालको आर्थिक तथा सामाजिक संरचनामा गम्भीर असर पारिरहेको छ।

खनालका यी टिप्पणीहरू हालैका विवादास्पद सरकारी नीतिहरूलाई लिएर चर्किएको बहसको निरन्तरता हो। अब सरकार यसमा के प्रतिक्रिया दिन्छ भन्ने चासो बढेको छ।

झलनाथ खनाल