काठमाडौं — प्रधानमन्त्री केपी शर्मा ओलीले आगामी भदौ ३ गते काठमाडौंको भृकुटीमण्डपमा सुरु हुने १७औं नाडा अटो शो २०२५को उद्घाटन गर्ने भएका छन्। नाडा अटोमोबाइल्स एसोसिएशन अफ नेपालको अध्यक्ष करण चौधरीको नेतृत्वमा गएको प्रतिनिधिमण्डलले सोमबार प्रधानमन्त्रीलाई प्रमुख अतिथिको रूपमा उद्घाटन गर्न औपचारिक अनुरोध गरेको थियो, जसलाई प्रधानमन्त्री ओलीले स्वीकार गरेका हुन्।

नाडाका अनुसार, यस वर्षको अटो शो नाडा स्थापनाको ५०औं वार्षिकोत्सवसँगै आयोजना हुँदैछ। अध्यक्ष चौधरीले अटो शोमा १२५ भन्दा बढी प्रदर्शक, ३० भन्दा बढी सवारी साधनका ब्रान्ड, इलेक्ट्रिक, हाइब्रिड र स्मार्ट मोबिलिटी समाधान, विन्टेज मोटर शो, र नेपालमा पहिलोपटक प्रदर्शन हुने उन्नत रोबोट तथा भविष्यमुखी प्रविधि प्रदर्शनीका मुख्य आकर्षण हुने जानकारी दिए।

संघको भनाइमा, प्रधानमन्त्रीको सहभागिताले अटोमोबाइल क्षेत्रका व्यवसायीलाई थप हौसला दिनेछ। सो अवसरमा उपाध्यक्ष राजनबाबु श्रेष्ठ, महासचिव सुरेन्द्रकुमार उप्रेती, सचिव विक्रम सिंहानिया, कोषाध्यक्ष मिलनबाबु मल्ल, सह–कोषाध्यक्ष पंकज अग्रवाल र केन्द्रीय सदस्य मेघराज पौडेल पनि उपस्थित थिए।

१७औं नाडा अटो शो २०२५ भदौ ३ देखि ८ गतेसम्म सञ्चालन हुनेछ, जसमा सहभागीहरूले सवारीसाधन प्रविधिको नवीनतम विकास नजिकबाट अवलोकन गर्ने अवसर पाउनेछन्।