गत असारमा सर्वसाधारणलाई सेयर बिक्री गरेर करोडौँ उठाएको ट्रेड टावर लिमिटेड अहिले कानुनी विवाद र आर्थिक संकटमा फँसेको छ। अझ ठूलो कुरा, यस्ता गम्भीर मुद्दा चलिरहेका बेला पनि नेपाल धितोपत्र बोर्ड (SEBON) ले कम्पनीलाई IPO ल्याउन अनुमति दिएको घटना बजारमै ठूलो घोटालाको संदेहको विषय बनेको छ।

कम्पनीको आर्थिक अवस्था पहिले नै कमजोर थियो। नाफा झण्डै शून्यमा पुगेको, सम्पत्तिभन्दा धेरै दायित्व बोकेको, र व्यापारिक मोडल पनि भाडामा मात्रै टिकेको अवस्थामा कम्पनीले IPO बाट सजिलै पैसा उठायो। यसरी जनताको पसिनाको पूँजी जोखिममा राख्दा नियामक बोर्डले किन आँखा चिम्लियो भन्ने प्रश्न अहिले हरेक लगानीकर्ताले उठाइरहेका छन्।

मुकुन्दमणि र मुराहरि अर्यालको भनाइअनुसार २०७५ पुसमा भएको लिज सम्झौतामा ३ करोड ९० लाख भुक्तानी हुने सहमति भए पनि मिति तोकिएको थिएन। २०७७ असारमा सम्पत्ति बुझाए पनि उनीहरूले पैसा पाएका छैनन्। उल्टै सम्झौता लगत्तै ४४ वटा बिअरर चेकमार्फत दंगाल पक्षले रकम आफ्नै खातामा भुक्तानी गराएको प्रमाण भेटिएको भन्दै उनीहरूले ठगी, बैंकिङ कसुर र सम्पत्ति शुद्धीकरण मुद्दा दर्ता गरेका छन्। प्रहरी परिसर काठमाडौंले मुद्दा दर्ता गरे पनि दंगाललाई सोही दिन रिहा गरिएको घटनाले अनुसन्धानको विश्वसनीयता नै प्रश्नमा पारेको छ।

वित्तीय विवरणले पनि लगानीकर्ताको चिन्ता बढाएको छ। कुल आम्दानी ७५ प्रतिशतले बढे पनि खर्च तीन गुणा बढ्दा नाफा २ करोड १३ लाखबाट घटेर १ लाख ३० हजारमा सीमित भएको छ। प्रतिशेयर आम्दानी ५ रुपैयाँ ६१ पैसा घटेर २ पैसामा पुगेको छ भने दायित्व २९ करोड ५० लाखमा पुगेको छ। यस्तो अवस्थामा पनि IPO अनुमोदन हुनु नियामककै संरक्षणबिनाको सम्भव छैन भन्ने धारणा बजारमा फैलिएको छ।

दंगालले भने आफू कानुनी प्रक्रिया चलिरहेका कारण विस्तृत टिप्पणी दिन नसक्ने बताएका छन्, साथै ३ करोड ९० लाखको विवाद मूल लिज सम्झौतासँग प्रत्यक्ष सम्बन्धित नभएको दाबी गरेका छन्। तर लगानीकर्ताका नजरमा यो अब दुई पक्षबीचको साधारण विवाद होइन—बोर्डकै छायाँमा भएको ठगीको ज्वलन्त प्रमाण हो।

नेपाल धितोपत्र बोर्डलाई कानूनले लगानीकर्ताको हित सुरक्षित गर्ने जिम्मा दिएको छ। तर विवादित कम्पनीलाई बजारमै पठाएर सेयर बेच्न दिइएको घटनाले बोर्डकै भूमिकामाथि गम्भीर प्रश्न खडा भएको छ।

ट्रेड टावर प्रकरणले नेपाली सेयर बजारको मूल चरित्रमाथि नै प्रश्नचिन्ह खडा गरिदिएको छ—के यो बजार वास्तवमै जनताको पूँजी सुरक्षित गर्ने थलो हो, कि नियामककै संरक्षणमा चल्ने ठगीको नयाँ प्रयोगशाला? जवाफ समयमै नआए लगानीकर्ताको विश्वास भत्किने खतरा झन् बढ्दै जाने देखिन्छ।

---

सूचना:
ट्रेड टावर र नेपाल धितोपत्र बोर्डबीचको मिलेमतोमा भएको भनिएको ‘सेयरमार्फत ठगी’ प्रकरणबारे थप विवरणहरू बाहिर आउँदै छन्। कम्पनीको आर्थिक विवरण, लगानीकर्तामाथि परेको जोखिम, नियामकको भूमिका र भित्रभित्रै भएको खेलबारे हामीले प्राप्त गरेका थप प्रमाणहरू क्रमशः सार्वजनिक गर्दैछौं।

👉 विस्तृत खबर र नयाँ खुलासा सहितको फलोअप चाँडै आउनेछ।
लगातार अपडेटका लागि हामीसँगै रहनुहोस्।

ट्रेड टावर