काठमाडौं महानगरपालिकाका मेयर बालेन्द्र शाह (बालेन)ले हालसालै काठमाडौंको सीमाभन्दा बाहिर गएर राष्ट्रिय राजनीतिमा आफ्नो धारणा व्यक्त गर्न थालेका छन्। धेरैले यो कदमलाई उनको राजनीतिक भविष्यको संकेत दिने ठुलो पाइला मानेका छन्। बालेनले सामाजिक सञ्जालमा सरकारको हस्तक्षेपको आलोचना गर्दै प्रधानमन्त्री केपी शर्मा ओलीलगायत उच्च नेताहरूको राजनीतिक सुझबुझमाथि प्रश्न उठाएका छन्। उनी राष्ट्रिय राजनीतिमा सक्रिय रूपमा लाग्न चाहिरहेका छन्, र चाँडै नै नयाँ राजनीतिक दल स्थापना गर्ने चर्चा चलेको छ। बालेनका यी क्रियाकलापले उनलाई अब एक ठुलो राजनीतिक खेलाडीको रूपमा उदाउने सम्भावना देखाइरहेको छ।

काठमाडौं महानगरपालिकाका मेयर बालेन्द्र शाह (बालेन)को जनताबीचको लोकप्रियता र नेतृत्वदायी क्षमताले उनलाई राजनीतिक क्षेत्रमा स्थायी प्रभाव पार्न सक्ने नेताका रूपमा देखाएको छ। हालसालै, उनले फेसबुकमा एमाले सांसदहरूको आलोचना गरेको स्टाटस हटाएपछि, बालेनका समर्थकहरूले प्रधानमन्त्री केपी शर्मा ओलीलाई फेसबुकमा ‘अनफोलो’ गर्ने अभियान सुरु गरेका छन्। यो घटनाले बालेनको सम्भावित राजनीतिक पार्टी खोल्ने योजनामा नयाँ अध्याय सुरु गर्न सक्ने संकेत दिएको छ।

बालेनको राजनीतिक दल खोल्ने समयरेखा यस्तो रहेको श्रोत बताउँछ:

१. पार्टीको आवश्यकता पुष्टि गर्ने वातावरण बनाउने: बालेनको नेतृत्वले पुराना राजनीतिक दलहरूप्रति निराश भएका जनतामा नयाँ आशा जगाएको छ। उनको नयाँ शैली, साहसिक निर्णय क्षमता, र जनतासँगको नजिकको सम्बन्धले बालेनलाई राजनीतिक विकल्पको रूपमा प्रस्तुत गरिरहेको छ। यस अवस्थालाई ध्यानमा राख्दै, बालेन र उनका सल्लाहकारहरूले पार्टी खोल्न आवश्यक वातावरण निर्माण गर्दैछन्। यो कार्यको पहिलो चरणमा बालेनले विभिन्न सार्वजनिक मञ्चमा पुराना दलहरूको असफलतामाथि प्रहार गर्दै जनतालाई नयाँ विकल्पको आवश्यकता सम्झाइरहेका छन्।

२. प्रधानमन्त्रीलाई प्रहार गर्ने: रबि लामिछानेले ‘जनतासँग प्रधानमन्त्री’ कार्यक्रमबाट निकालिएपछि, ‘जनतासँग सिधा कुरा’ कार्यक्रममार्फत जनसमर्थन सृजना गरे। बालेनले पनि प्रधानमन्त्री केपी शर्मा ओलीलाई प्रहार गरेर बृहत्तर अभियान सुरु गर्दैछन्। यसबाट उनले आफ्नो राजनीतिक आवश्यकता र पार्टी खोल्ने औचित्यलाई जनसमक्ष स्थापित गर्नेछन्।

३. पुराना पार्टीहरूलाई प्रहार गरेर जनताको आक्रोशमाथि राजनीतिकरण गर्ने: बालेनको पार्टीको मुख्य रणनीति पुराना राजनीतिक दलहरूको आलोचना गरेर तिनीहरूको कमजोरी उजागर गर्नु हो। यो कदमले ती दलहरूलाई बालेनविरुद्ध मोर्चाबन्दी गर्न उक्साउनेछ। यसले जनतामा पुराना दलहरूप्रति अझ बढी आक्रोश बढाउनेछ, जसलाई बालेनले आफ्नो पक्षमा राजनीतिकरण गर्नेछन्।

४. नगरपरिषदमा असहयोगको जवाफमा राष्ट्रिय राजनीति हस्तक्षेप गर्ने: बालेनलाई महानगरपालिकाको काममा अवरोध पुर्‍याउने उद्देश्यले प्रधानमन्त्रीको पार्टीका सदस्यहरूले नगरपरिषद्मा असहयोग देखाएका थिए। वडाध्यक्षहरूले पनि बालेन विरुद्ध सडक आन्दोलनको धम्की दिएका थिए। यस अवस्थाको प्रतिक्रिया स्वरूप, बालेनले राष्ट्रिय राजनीतिमा हस्तक्षेप गर्न आवश्यक ठानेका छन्।

५. राष्ट्रिय राजनीतिमा हस्तक्षेपको लागि सबै परिस्थितिको सहि मूल्यांकन गर्ने: यस चरणमा बालेनले राष्ट्रिय राजनीतिक परिदृश्यको विस्तृत अध्ययन गरी आफ्नो रणनीति निर्धारण गर्नेछन्। उनले वर्तमान सरकारको कमजोरी, जनता बीचको असन्तोष, र पुराना दलहरूको आन्तरिक विवादलाई आफ्नो फाइदामा प्रयोग गर्नेछन्।

६. पार्टी घोषणा गर्ने: सबै परिस्थितिहरू अनुकूल भएपछि, बालेनले औपचारिक रूपमा आफ्नो नयाँ राजनीतिक पार्टीको घोषणा गर्नेछन्। यस घोषणामा बालेनले जनताको लागि नयाँ विकल्प, भ्रष्टाचारविरुद्ध लडाई, र पारदर्शी शासनको वचन दिनेछन्।

७. पार्टी दर्ता गर्ने: पार्टी घोषणा पश्चात, बालेनले आफ्नो पार्टीलाई कानुनी रूपमा दर्ता गर्ने प्रक्रिया सुरु गर्नेछन्। यस क्रममा उनी विभिन्न जनप्रतिनिधिहरू, समाजसेवीहरू, र प्रतिष्ठित व्यक्तित्वहरूलाई पार्टीमा समावेश गराउने प्रयास गर्नेछन्।

८. सकेसम्म बहुमत ल्याउने, नसके प्रतिपक्षमा बस्ने: बालेनको अन्तिम उद्देश्य भनेको आगामी चुनावमा आफ्नो पार्टीलाई सकेसम्म बहुमत प्राप्त गराउनु हो। तर, यदि यो सम्भव भएन भने, उनले विपक्षी दलको रूपमा बस्ने योजना बनाएका छन्। बालेनले रबि लामिछाने जस्तै, सरकारमा मन्त्री पदको लोभ नगरी, सशक्त प्रतिपक्षको भूमिकामा रहन चाहन्छन्।

यसरी, बालेनले आफ्नो नयाँ पार्टीको माध्यमबाट पुराना दलहरूको विकल्प प्रस्तुत गर्ने र नेपाली राजनीतिमा नयाँ युगको सुरुवात गर्ने योजना बनाएका छन्। उनको व्यक्तित्व र करिश्मा कुनै दक्षिण भारतीय चलचित्रका नायकसँग तुलना गर्न सकिन्छ। अग्लो कद, आकर्षक अनुहार, र स्वभावमा गम्भीरता भएका बालेन्द्र शाहले काठमाडौंको विकासका लागि साहसी निर्णयहरू गरेका छन्। युवाहरूको बीचमा उनी आकर्षणको केन्द्रबिन्दु बनेका छन्।

बालेन्द्र शाह